Menneskeleg feil.

Det vedgår Indre Nordhordland Dampbåtlag var årsaka til at det tidlegare hurtigruteskipet MS «Nordstjernen» gjekk på eit skjer ved Haugesund forrige veke.

På brua blei seglingsmerka i Karmsundet feiltolka idet skipet sette full speed på veg mot havstykket Sletta, går det fram av ulukkesrapporten som er levert Sjøfartsdirektoratet.

Styrbord for tidleg

Feiltolkinga førte til at «Nordstjernen» svinga mot styrbord for tidleg og gjekk i 15 knops fart opp på eit skjer ved Tonjer fyr like vest av Haugesund.

Både kapteinen, hans nestkommanderande og ein rormann var på brua då grunnstøytinga skjedde klokka 22.04 måndag 11.november.

Sikten var god, vinden bles 6 sekundmeter, og bølgehøgda er i rapporten oppgitt til heile fem meter.

«Nordstjernen» blei trekt av grunnen morgonen etter uhellet, og hadde fått store skader i botnen. Ingen personar kom til skade.Fartøyet kunne ta seg på eigen kjøl til Westcon-verftet i Ølen der det er dokksett for repararsjon.

Tøffe vêrforhold

Båten var på veg frå Polen til Bergen med 21 personar om bord då uhellet skjedde. Veteranbåtselskapet sin kontaktperson Rafal Falkowski forklarer i rapporten til Sjøfartsdirektoratet at skipet hadde segla i tøffe vêrforhold heile ettermiddagen, og at mannskapet kan ha blitt trøytt og stressa av det.

Ettersom ordninga med sjøforklaring er avskaffa, blir grunnstøytinga etterforska av Haugaland og Sunnhordland politidistrikt. Politijurist Celin Hauge Andersen opplyser at det er gjort avhøyr av mannskap og teke blodprøvar. Etterforskarane avventar resultatet av blodprøvane og av tekniske undersøkingar.

På verkstad i 5-6 veker

«Nordstjernen» gjorde teneste som hurtigruteskip til Kirkenes og cruiseskip til Svalbard fram til i fjor sommar. Indre Nordhordland Dampbåtlag overtok det 58 år gamle skipet i fjor haust, og har hatt henne på verkstad i Gdansk i Polen.

Då «Nordstjernen» var på veg til Bergen, var det meininga at ho skulle liggja ved kai i Vågen i Bergen som restaurantbåt i julebordsesongen. Reiarlaget var i samtale med Bergen havnevesen om plassering då grunnstøytinga skjedde.

— Vi veit dessverre ikkje om vi når førjulssesongen, for det kan bli verkstadopphald hos Westcon i fem-seks veker, seier Rafal Falkowski.