OPNAR: Kyrkja i Breim opnar dørene nyårsaftan, for folk som vil minnast dei drepte i trafikkulykka i Våtedalen 2. juledag.
C. Hill, Wikimedia Commons

I Byrkjelo og Breim er alle arrangement avlyst denne jula, etter at eit eldre ektepar frå Byrkjelo omkom i ei trafikkulykke i Våtedalen 2. juledag.Heller ikkje nyttårshelga blir det noko av dei planlagte arrangementa, og difor vil kyrkja i Breim no opne dørene klokka 13 nyttårsaftan, melder NRK på sine nettsider.

— Dette er for at folk skal kunne kome dit, tenne eit lys og ha ei stille stund, seier sokneprest Tore Myklebust.

Presten skal lese frå skrifta, og det blir salmesong.

— Vi tenkjer at dette er ein måte for folk å få uttrykkje medkjensle på, og vise at dei står saman, seier han.

Myklebust seier ulykka er det store samtaleemnet i både i Breim og nabobygda Byrkjelo.

— Det er klart at det òg er litt spesielt når det skjer i julehøgtida. Det legg ein dempar på det som elles ville vere ei feiring, seier han.