Dagen i dag vil starte med regnbyger som vil gå over til sludd og snø utpå kvelden. Men så store mengdene blir det ikkje snakk om. Og etter ein torsdag og fredag med noko som kan minne om vintervêr, kjem varmare luft på ny innover Vestlandet laurdag.

— Vi får ikkje fullt så høge temperaturar utover i neste veke som det vi har hatt siste dagane. Det går mot eit noko kaldare vêrlag, men det ser dårleg ut med snø i låglandet. Men i fjellet vil nok snøgrensa krype nedover, meiner vakthavande meteorolog ved Vêrvarslinga på Vestlandet, Karsten Eitrheim.

Meir regn

Hans meteorologkollega i Storm, Fredrik Villanger, opplyser at etter eit par dagar med nordavind, blir det «godt gammaldags vestavêr» att frå laurdag.

— Vi har no utsikter som går framover mot 19. desember. Desse fortel om varierande temperaturar. Gjennomgåande blir det ikkje så mildt som det har vore i det siste, men vi må nok belage oss på meir regn.

— Så dei som må ha kvit jul, har dårlege utsikter?

— Vi kan i alle fall ikkje love noko med dei utsiktene vi har så langt.

Dei siste dagane har vore ekstremt mildt for årstida. I går var det for eksempel opp mot ti plussgrader fleire stader på Vestlandet. Og på Norges tak, Finse i 1222 meters høgde, var det 0,5 varmegrader.

— Vi må nok godt over 1000 meter for å finne nedbør som snø på Vestlandet i dag, meinte meteorolog Eitrheim då Bergens Tidende snakka med han i går ettermiddag.

Skikkeleg regndag

I låglandet låg skylaget i går fleire stader i ankelhøgde. På kysten bles det såpass at flyplassen i Florø blei stengd. Og alt ved middagstider var det mørkt. I alle fall kjendest det slik.

Men i følgje ekspertane var det ikkje noko uvanleg med gårsdagen.

— Så langt snakkar vi om ein skikkeleg god regnvêrsdag, konstaterte Eitrheim.

Men kanskje skal vi vere glade for det. For storstormane har vi så langt sleppt unna. I dag brakar det i følgje meteorologane nok ein gong laus i Nord-Norge. I går ettermiddag sende dei ut ekstremvarsel om vestleg sterk storm, kanskje også orkan i områda mellom Salten og Vesterålen. I tillegg vil det bli svært store bølgjer.

— Det ser riktig ille ut for store deler av Nord-Norge, seier Karsten Eitrheim.