Den 50 år gamle mannen frå ein av Bergens omeignskommunar er no dømd for å ha køyrd bil på Sotra med ei nær dødeleg mengde alkohol i kroppen.

Grunnlovstur

Bilturen skjedde på sjølvaste 17. mai i fjor. I 20-tida på kvelden tok mannen bilen fatt på Sotra.

Etter ein kort køyretur kom han over i motsett køyrefelt, der han kolliderte i ein annan bil.

Sjølv vart mannen hardt skadd i samanstøytet. To menn i den andre bilen vart begge lettare skadde.

To timar etter ulykka, blei alkoholkonsentrasjonen i blodet til 50-åringen målt til 3,45 i promille.

Nær døden-nivå

Ein promille på tre tilseier at du lett kan bli medvitslaus. Du mistar kontroll på ein del kroppslege funksjonar, inkludert urinblæra. Tre eller meir kan vere dødeleg, mens over fire er dødeleg.

I Nordhordland tingrett tilsto mannen alt, inkludert at han nokre månadar seinare igjen hadde plassert seg seg bak eit ratt, sjølv om lappen var tatt frå han.

Bot og betring

«Kjøring med en så høy alkoholkonsentrasjon i blodet innebærer et betydelig potensial for fare i trafikken, som her realiserte seg ved at kjøringen endte i trafikkuhell med både personelle og materielle skader», skriv Nordhordland tingrett i kjennelsen.

Tilståinga gav mannen strafferabatt, og han er dømd til 36 dagars betinga fengsel, på vilkår av at han deltar i eit promilleprogram. I tillegg må han betale 10.000 kroner i bot.