Via bistandsadvokat Steinar Ingebrigtsen bad den 45 år gamle kvinna om at Larsen vart flytta, slik at ho skulle sleppe å sjå han frå vitneboksen. Det var henne Larsen oppsøkte heime den fatale oktobernatta i 2010 då Kay Ivar Sommarschild vart skoten og drepen.

Løysinga vart at Larsen skal sitje i tolkeboksen i Gulating lagmannsrett medan ho forklarer seg. Dette er eit eige rom med vindauge inn til rettssalen der saka går.

— Vittig og oppvartande

Larsen vart i tingretten i januar dømt for å ha prøvd å drepe den 45 år gamle kvinna. Han troppa opp heime hos henne væpna med pistol. Det endte med at Kay Ivar Sommerschild, som var saman med dotter hennar, vart skoten på kloss hald. Sommerschild døydde same natt av blødingane.

Den 45 år gamle kvinna skildra eksen som svært sjarmerande då dei først møttest.

— Han var vittig og oppvartande. Han var svært interessert, og tok godt vare på meg, sa kvinna, som møtte Larsen i 2008.

Telefonen eit mareritt

Etterkvart viste mannen langt mindre sympatiske sider.

— Han sendte veldig mykje tekstmeldingar. Han vart sint om eg ikkje svarte straks. Telefonen vart eit mareritt. Eg vart livredd for ikkje å høyre han, sa 45-åringen.

Ho forklarte at Larsen heller ikkje likte at ho hadde kontakt med sine eigne barn.

— Om han høyrde eg snakka med den yngste dotter mi på kjøkkenet, kunne han bli veldig sint. Han trudde vi snakka om han, sa kvinna. Etter raseriutbrota kunne han bli lei seg og beklage.

— Då sa han at han elska meg, og at han hadde problem med å stole på folk. Han var sjalu, sa eks-sambuaren.

Har bytta advokat

Nils Steinar Larsen har bytta advokat sidan saka var oppe i tingretten i januar. Forsvarar Øystein Storrvik sa i retten at Larsen innrømmer at han tok med seg ein ladd pistol heim til eks-sambuaren.

— Han erkjenner at han tok med eit ladd våpen inn i ein konfliktsituasjon. Han tek også ansvaret for det som hende i husværet. Spørsmålet er kor langt dette ansvaret strekkjer seg, sa Storrvik.

Larsen sa seg skuldig i lekamsskading med døden til følgje då ankesaka tok til i dag. I tingretten vart han dømt for forsettleg drap på 25-åringen. Han vart også dømt for overlagt drapsforsøk på eks-sambuaren, og for forsettleg drapsforsøk på dotter hennar. Larsen fekk 19 års fengsel -- eitt år meir enn aktor hadde bedt om.

Dottera til eks-sambuaren forklarte i tingretten at Larsen skaut mot henne før han skaut Sommerschild, og at han også prøvde å skyte mot henne etter at kjærasten var treft i magen.

DØD: Kay Ivar Sommerschild (25).
PRIVAT