Klokka 00.20 natt til laurdag fekk politiet i Haugaland og Sunnhordland politidistrikt melding om at ein mann hadde falt på sjøen på Leirvik på Stord.

Mannen var i byrjinga av 40-åra, og var på besøk frå Finland.

— Grunnen til at han falt er ukjent, men han var tydeleg berusa då han kom opp igjen, så det har vel noko med det å gjera, seier operasjonsleiar Svein Roald Vikse.

Mannen blei raskt oppdaga av vaktene på utestaden Sjøhuset, som fann ein redningsbøye i ein båt og fekk redda mannen opp.

— Han blei så frakta til hotellet han budde på, fekk på seg tørre klede og vart undersøkt av lege. Antakeleg har han ikkje vore lenger enn tre minutt i vatnet, så heldigvis gjekk alt bra, seier Vikse.

Han kan elles melda om ei roleg natt for politiet.