Huset vart råka av lynnedslag vel ein time etter midnatt.

— Vi hadde bestemt oss for å reisa til Sleen denne helga, men så hadde Bodil fått med seg at vêrutsiktene var elendige, og vi avlyste, fortel Per Ove Pedersen til bt.no.

- Kanskje eig eg for mange ting

Han ser på restane av det nyrestaurerte huset, og tenkjer med gru på kva dei kunne ha opplevt om helgeplanen hadde vorte gjennomført.

— Kanskje eig eg for mange ting, seier han ettertenksamt, og viser til visdomsord om dersom du eig for mange ting, så eig tinga deg.

Vossingen Per Ove Pedersen er ofte kalla Hotellkongen i Hardanger.

Han eig tre hotell i Ulvik, eitt i Eidfjord og eitt i Øystese.

- Mykje av barndommen opp i røyk

Siste tilveksten er Oppheim hotell på Vossestrand. Sleen ligg litt lengre aust langs E16, nesten til Stalheim.

Her budde besteforeldra til Pedersen, og herifrå har han mange barndomsminne.

— Mykje av barndommen min har gått opp i røyk i natt, kommenterer han.

Morfaren reiste huset på 1930-talet. Han kombinerte småbruket med jobb som bussjåfør.

Pedersen har rusta huset opp etter at han overtok det som fritidsbustad. No var det fullstendig renovert ein gong til, etter ein vasslekkasje for eit par år sidan.

Lekkasjen kom på kaldaste vinteren, og vatnet fraus til is inne i heile huset.

-Forsikringsselskapet er neppe særleg glad i meg. Det blir ikkje kjekt å ringja til forsikringskonsulent Hommedal og fortelja om brannen, seier Pedersen.

Det er ikkje meir enn eit par veker sidan Pedersen hadde innbrot i privathuset sitt på Voss.

Nokre av tinga inne i huset på Sleen var uerstattelege, men han innstilt på å setja huseti stand att.

BRANN:
ARNE HOFSETH