— Så lenge du er frisk, ser du aldri føre deg at livet skal ta slutt, sa Janne Cirotzki (45) til Sogn Avis for ein liten månad sidan.

Det sette i gang ein innsamlingsaksjon for den kreftsjuke småbarnsmora. Lisjejulafta passerte støtteaksjonen ein million innsamla kroner, nok til å betale for den livsforlengande behandlinga.

Ei betre jul

Cirotzki sjølv er ovandotten over responsen og svært takksam.

— Ingen hadde trudde det. Det er heilt fantastisk at det går an å samle inn ein million til helsa mi. Det fins ikkje ord for å beskrive det, seier ho til BT.

DØTRE: Trebarnsmora Janne Cirotzki fann ein kul i brystet då ho var nybakt mor til Linnea (6). Til venstre Cecilie (25).
Hanne Stedje, Sogn Avis

I staden for ei mindre kjekk julefeiring, blir det no ei betre jul for ho, ektemannen Leif Inge, dei tre barna og to barnebarn.— Formen har byrja å komme tilbake. Matlysten er tilbake, seier Cirotzki. Også barnabarna er det no mogleg å ha på besøk utan at ho blir utslitt.

Krefttypen Cirotzki er ramma av er uhelbredeleg. Medisinen kadcyla kan forlenge livet. I oktober vedtok helsevesenet at kadcyla ikkje skal vere tilgjengeleg for pasientar gjennom det offentlege helsetenesta, ifølgje Sogn Avis.

Til det er medisinen for dyr når den samtidig berre er livsforlengande, ikkje helbredande.

GRUPPA: Denne aksjonsgruppa står bak innsamlinga. Frå venstre Rolf Jerving, Lars Øyving Vikesland, Bente Øien Hauge og Odd Helge Brugrand.
Hanne Stedje, Sogn Avis

Fem personar i støttegruppa har stått bak innsamlinga. No ønskjer dei å takke alle som har bidratt med alt frå 100 kroner til titusenvis.— Alle bidrag, både store og små, har vore viktige. Utan dei mange som har sett inn mindre summar, eller dei få som har sett inn store summar, hadde vi aldri klart å samle inn nok pengar til å gje Janne Cirotzki den medisinen ho treng, skriv dei i ei melding.

Cirotzki oppdaga ein kul i brystet tidleg i 2009, kort tid etter at ho hadde fått Linnea (no 6 år).

For 45-åringen er målet blitt å få leve så lenge at ho får sjå barnebarna vekse til og at minstejenta skal forstå litt meir.

- Eit fantastisk lokalsamfunn

Ektemannen Leif Inge Fossen seier familien er mållause over resultatet.

— Det er ei fantastisk julegåve. Det er eit fantastisk lokalsamfunn. Eg har aldri høyrt om liknande, seier han.

Innsamlingsaksjonen var i utgangspunktet ein støtteaksjon mot helsevesenets vedtak.

— Men så spurte mange etter eit kontonummer. Då blei det oppretta ein konto. Og etter eit par dagar ville nokre lage ein innsamlingsaksjon, seier Fossen.

Sist veke byrja Cirotzki på ein ny cellegiftkur, av den siste typen ho kunne prøve i helsevesenet, ifølgje ektemannen.

Blir anbefalt

Kadcyla blir anbefalt av overlege Hans Petter Eikesdal ved Haukeland universitetssjukehus. Han har behandla Cirotzki.

— Medisinsk sett er dette ei behandling som hadde vore viktig å kunne gje til pasientar som Janne. Eg kan ikkje garantera at det har ein effekt – det kan ein aldri – men potensielt kunne den ha hjelpt henne, sa han til Sogn Avis i november.

For Janne Cirotzki blir det no juleferie før den livsforlengande medisinen kan kome til nytte.

— Behandlinga skal forhåpentlegvis starte opp rett etter nyttår. Eg ser fram til det, seier ho til BT.