Ein bil og eit vogntog kolliderte på E16 ved Bulken i Voss, litt over klokka 20 torsdag kveld.

— Det var fire personar i personbilen, seier operasjonsleiar Preben Wallestad i Hordaland politidistrikt.

Føraren av vogntoget har forklart at han mista veggrepet på det glatte føret. Ein eller flere bilar vart trufne av hengaren.

Frakta med luftambulanse

Sjåføren i personbilen sat fastklemt, men han er no frigjort og frakta til Haukeland universitetssjukehus med luftambulanse.

Politiet har førebels ikkje oversikt over skadene til den tidlegare fastklemde mannen. Dei tre andre i personbilen slapp utan synlege skader.

Etter det BT får opplyst, går det etter tilhøva bra med mannen på Haukeland. Skadene skal ikkje vere alvorlege. Mannen skal vere sonen til bileigaren.

BT får opplyst av politiet at sjåføren mista medvitet etter ulykka, men at han kvikna til då ambulansefolka kom til staden.

Køyrde inn i vrakdelar

På ulykkesstaden har fleire andre bilar kjørt inn i kvarandre. Ein eller fleire har kjørt inn i det som blir kalla vrakdelar.

Både brannvesen og ambulanse rykka ut. Vegen vart sperra av politiet, men er no opna igjen. Vegen kan likevel bli stengt igjen seint torsdag kveld på grunn av ulykkesarbeid, ifølgje Vegtrafikksentralen i Hordaland.

Det er den andre store ulykka i dag på det glatte føret, etter at minusgrader mange stadar er blitt til plussgrader og opphald er blitt til regn. To personar omkom natt til torsdag langs E39 på Stord i ei utforkøyring.

ULYKKE: Kollisjonen skjedde ved Bulken i Voss. Ein person er frakta med luftambulanse til Haukeland universitetssjukehus.
Arnstein Karlsen
Ulykked_E16_Voss_ak_SMA_6923.jpg
Arnstein Karlsen