• Eg forstår panikken hennar, og forstår at ho kjempa for livet, sa tiltalte (37) i si forklaring. - Ingen tvil om at ho gjorde det, repliserte aktor.

Den fornærma kvinna i 20-åra makta ikkje å gje si vitneforklaring med sin tiltalte eks-kjærast til stades i salen.

Så var det også ei ekstraordinært rå historie som vart rulla opp i Fjordane tingrett i går.

Ville ha siste ordet

Før kvinna slapp til med si forklaring bak lukka dører, hadde nemleg eks-kjærasten i detalj gitt sin versjon av korleis han klikka i husværet hennar natt til 1. mai i år.

For tiltaltes del var bakteppet alkohol— og narkotikarus kombinert med frustrasjonen over at forholdet hadde tatt slutt tidlegare på dagen.

Aktor, politiadvokat Bjørn Larsen, ville vite kvifor tiltalte oppsøkte kvinna denne natta.

— Eg ville på ein måte ha siste ordet, få sagt at ho hadde oppført seg dårleg i forholdet, få vist henne at ho ikkje lenger hadde noko tak på meg, sa den tiltalte 37-åringen, som har hatt rusproblem sidan tidleg i tenåra.

Dermed utvikla det som starta som ein normal samtale i sofagruppa seg til ein uhemma orgie i vald og skadeverk i sokkelhusværet som kvinna leigde.

Redd for livet

Tiltalte forklarte seg i detalj om valdsbruken, men nekta for å ha slått henne i den grad det framgår av tiltalevedtaket. Ut frå dette erkjende han berre delvis straffskuld i retten. Likevel måtte han i ettertid erkjenne at kvinna må ha vore livredd medan det heile stod på.

— Du har sagt at ho var livredd. Trur du ho bokstaveleg tala var redd for livet sitt, spurte aktor.

— Ho må jo ha vore vettskremt, men kor går grensa for å vere redd for å døy? Eg hadde i alle fall ikkje tankar om å drepe henne, svara 37-åringen.

— Tenkte du på korleis ho hadde det?

— Dette skjedde jo på ti minuttar maks, der eg eksploderte og tømde ut raseriet mitt. Eg hadde ikkje rasjonelle tankar då.

I etterkant fann lokalt politiet og Kripos eit rasert husvære der ting som potteplanter og gullfiskbolle var knust i vegger og golv, blodspor oppover vegger og innsparka dører.

Klarte å ringe

Bak ei låst badedør rakk kvinna å ringe ei veninne før 37-åringen knuste seg inn døra og så knuste mobiltelefonen hennar.

Episoden slutta med at mannen med slag og halsgrep fekk henne dit han ville. Deretter gjekk ut av huset, møtte politiet og vart lagt i jern.

Marerittet var over for kvinna, som politiet tok med direkte til sjukehuset.

I retten la offerets bistandsadvokat Inger Beth Fosse ned påstand om mein-erstatning på opptil 300.000 kroner, oppreising på opptil 100.000 kroner pluss samla erstatning for utgifter og tapt inntekt på 23.000 kroner.

Bistandsadvokaten vil etter hennar ønske ikkje uttale seg om saka, men det er klart at kvinna har opplevd saka og alt i kjølvatnet som ekstremt traumatisk.

Mannens forsvarar, advokat Louis Anda, har på si side meint at kvinna sin opphavlege helsesituasjon kan spele ei rolle med tanke på dei såpass store skadefølgjene i saka.

Apneseth Oddleiv