• Er eg sjeleglad for at du ikkje var med på denne turen, seier Kim Christensen (27) til sambuaren sin etter ei nifs utforkøyring på E16.

Gjensynsgleda var stor då Elin Redalen (22) onsdag troppa opp på Voss sjukehus med eit par sko i den eine handa og ein plastpose med klede i den andre.

Sambuar Kim Christensen hadde på forunderleg vis overlevd ei stygg utforkøyring på E16 midtvegs mellom rundkøyringa på Vinje og skulen på Sundve på Vossestrand.

For ei veke sidan var Elin med på turen, og låg og sov i senga bakerst i førarhytta på vogntoget då dei passerte Sundve. No ligg senga godt under vatn i den frådande Strandaelva.

— Eg kom meg ut fordi eg ikkje hadde bilbeltet på, og frontruta var såpass knust at eg fekk laga stort nok hol, seier Christensen.

Satt fast i tre kvarter

Han vart sitjande på taket av førarhytta i tre kvarter, kledd i t-skjorte og bukse, før han mørbanka og sterkt nedkjølt vart boren inn i ambulansen.

Klokka var om lag kvart på to natt til onsdag då Christensen passerte Vinje på veg frå Tyskland via Oslo til Bergen med varer til ein tax free-grossist, deriblant polvarer. Marerittet byrja i første høgresvingen nedanfor rundkøyringa.

— Eg merka at veggrepet glapp på det glatte føret. Som i sakte film glei vogntoget over på venstre side. Eg torde ikkje bremsa av fare for saksing. Eg vona at autovernet skulle halda meg på vegen, men det gav etter. Eg merka ikkje at det ytte motstand. Så bar det utfor, fortel Christensen til bt.no.

Han er temmeleg sikker på at vogntoget støytte mot eit av brukara på betongbrua over til Bjørgåslia med høgre sida av fronten. Dermed slitna førarhytta frå tilhengaren, og snurra rundt 180 grader. Tilhengaren vart liggjande på sida på andre sida av brua.

Kollega varsla om ulukka

Heldigvis kom kollega Roy Gilen med sitt vogntog nokre få minutt bak. Han ante uråd då han såg hjulspor utfor vegkanten, og berre avbrotne trestolpar att av autovernet. Han oppdaga kollegaen som klamra seg til biltaket, og fekk varsla redningsfolk.

— Eg er fortald at folk er mest opptekne av polvarene, men dei utgjorde berre ein liten del av lasta. 90 liter brennevin er ikkje all verda, seier den uheldige vogntogføraren som onsdag fekk skyss med sambuaren heim att til Hallingdal, litt lemster, og med ein god dose smertestillande frå sjukehuset på Voss.

Store mengde pizza og cola flaut nedover Strandaelva mot Sundve skule. Ein del ølboksar vart også tekne av straumen. Kanskje også polflasker, men dei overlevde neppe lenge før dei vart knuste mot steinane i den strie straumen.

Fleire tonn middagspølser og wienerpølser vart redda opp frå trailervraket onsdag. Ein del fårepølse av merket Vossafår var også med på lasset. Dei er produsert på Vinje, og frakta til Oslo. No var dei på veg mot Bergen, Englandsbåten og Danskebåten. Men 400 meter etter passering pølsemakeriet dei opphaveleg kom frå, ville dei liksom ikkje vera med lenger, og hamna i heimeelva.

BERGINGSARBEID: Vogntoget som køyrde utfor vegen mellom rundkøyringa på Vinje og skulen på Sundve på Vossestrand hadde polvarer, cola, pølser og pizza i lasta. Onsdag starta jobben med å få vogntoget opp frå elva.
Tor Høvik