Dyrevennen Marcus og to kompisar handla resolutt då dei såg ei kråke som stal ekornungar frå eit tre attmed fotballbanen.

Dei greidde å forstyrra kråka såpass at ho måtte sleppa den fjerde ekornungen or klørne. Med god førstehjelp og mating heime greidde Marcus å få det skadde og forkomne vesle dyret i god form att.

Pyrisept i såret

Det er bladet Sunnhordland som fortel historien om Marcus R. Kvarme og ekornet i dag. Bergingsaksjonen skjedde ved Hystad skule på Stord i slutten av mai, og før helga blei ekornet — som fekk namnet Sid etter sjefsdyret i Istid-filmane - sett i eit ope bur ved skogkanten i Sveio.

— Vi trudde det var småfugl kråka herja med. Men då vi såg nærmare på det som deisa ned i bakken, viste det seg å vera ein ekornunge. Han hadde eit sår på låret, og fekk ikkje til å gå då han prøvde, seier Marcus.

— Eg visste at dyreungar treng varme, og eg heldt ekornet i keeperhanskane og plasserte det deretter i ei stor lomme eg hadde på treningsdrakta.

Marcus tok den vesle pelsdotten med heim, smurde såret inn med Pyrisept, let Sid få bu i ei pappeske med spon og isolasjon, og mata han med morsmjølkerstatning.

Fotball framfor dyr

— Han såg ganske spak ut, og hadde ei rift i låret. Han låg ganske stille nokre dagar, og sov mykje. Vi var ikkje sikre på om han ville greia seg, men etter ei veke vakna han opp og tok til å bli veldig aktiv, fortel far til Marcus, Håvard Kvarme.

Etter kvar blei Sid og Marcus fortrulege. Ekornet farta rundt i huset, og elska å gøyma seg i eit ullteppe på sofaen. Favorittmaten hans var hasselneter, blåbær, iskrem og chips.

Familien blei einige om å sleppa dyreungen fri, og det skjer i kontrollerte former hos dyrevener i Sveio.

Ifølgje foreldra er det ikkje tilfeldig at det blei Marcus som tok hand om det skadde dyret. På ein sykkeltur stoppa han ein gong for å setja fri ein sau som hadde fått foten inn i eit gjerde. 11-åringen har hatt undulat, og har i dag både hund og katt.

- Du skal kanskje bli dyrlege eller noko slikt når du blir vaksen?

— Nei, eg trur eg går for fotballproff - på Manchester City, svarar keeperen på Stord G 11.

Farleg ekornliv

Å vera ekorn er farleg, sjølv om ein er lett og rask i kroppen. Mange ungar døyr før dei er eitt år gamle, anten fordi dei ramlar ut av bolet eller fordi dei blir tekne av kattar eller rovdyr som kråke og mår.

Balansen og klatredugleiken tek tid å utvikla. Ekorn blir fødde nakne, i kull på 3-7 ungar, dei får pels etter ti dagar, og opnar augene først etter ein månad, står det å lesa under ekornfakta på moseplassen.com. Ungane blir oppforstra av mor åleine. Ho gir dei mjølk i rundt åtte veker, då er avkommet blitt mobilt og kan ta til å forsørgja seg sjølv.

Ei svensk internettside om dyr tilrår at ekornungar som er forstra opp av menneske kan sleppast fri etter rundt åtte veker. Det kan skje frå eit transportbur i skogen, langt frå bilar og kattar. «Sjølv om dei er blitt «tamme» i løpet av handfôringa, så blir dei ville så snart dei blir sleppte fri, og går straks i gang med å søkja føde på eiga hand,» heiter det på nettsida.

GODE VENNER: Redningsmannen Marcus (11) og ekornungen Sid blei bestevenner.
VILDE HJERTHOLM LUNDE, SUNNHORDLAND