Etter det Bergens Tidende kjenner til, knyter det seg usikkerheit kring tidspunkta for fleire av vitneobservasjonane av 19-åringen og den 16 år eldre somaliaren.

Tidlegare har politiet gått ut med at Hedda henta jakka si i garderoben på Meieriet rundt klokka 01.15, og at dei to gjekk mot folkehøgskulen kring eit kvarter seinare. Men etter det Bergens Tidende kjenner til, skal politiet også ha vitneforklaringar om at dei alt 01.15 var like ved folkehøgskulen.

Dette er interessant fordi det betyr at somaliaren kan ha hatt tid til først å vere på folkehøgskulen, for så å vere tilbake i sentrum til kring 01.45 då ein 26 år gammal arbeidskollega seier han såg han ved ein kebabkiosk. Kollegaen, som torsdag blei sikta for falsk forklaring, har fått støtte av eit anna vitne som også hevdar å ha sett den sikta i matkøen.

Politiet har så langt ikkje tekniske bevis som knyter 35-åringen til drapet. Funn av biologisk materiale frå åstaden er no til analyse hos Rettsmedisinsk Institutt og i Kripos eige laboratorium.

— Først over helga vil vi få svar, opplyser politiadvokat Knut Broberg.

Politiet legg ikkje lenger skjul på at dei meiner 35-åringen har reist frå landet, men dei vil ikkje seie noko om kva opplysningar dei byggjer dette på. Politiet fryktar han kan ha søkt tilhald i land Norge ikkje har utleveringsavtale med.

Somalia og Libanon er mellom statane som peikar seg ut. 35-åringen har vore heime på ferie etter at han fekk opphald på humanitært grunnlag i 2001. I følgje VG har 35-åringen budd fleire år i Libanon. Dersom den drapssikta har reist til eit land utan utleveringsavtale, kan det bli svært vanskeleg både å finne han og få han stilt for norsk rett.