Jordskjelvet hadde senter 13,9 kilometer nede i grunnen rett nordvest for Selje sentrum.

— Det er vanskeleg å fastslå slikt nøyaktig, men skjelvet ser ut til å ha hatt sitt sentrum i strandsonen like utanfor tettstaden, seier avdelingsingeniør Berit Marie Storheim ved Institutt for geovitenskap ved Universitetet i Bergen.

Sjølv om skjelvet ikkje er spesielt stort, har folk merka ristingar over eit stort område. Ved Norsar, det norske jordskjelvinstituttet på Kjeller, har dei fått meldingar både frå Sunnfjord, Nordfjord og Sunnmøre.

— Seismiske bølgjer forplantar seg og når lenger her i landet fordi vi har ei jordskorpe med fast fjell. Slik berggrunn absorberer ikkje bølgjene så lett, seier profesor i seismologi ved Universitetet i Bergen, Kuvvet Atakan.

Området skjelvet fann stad, er av dei mest jordskjelvaktive i landet.

-Vi reknar med at det i havområda rundt og utanfor Stad i snitt skjer eit skjelv i veka. Men jordskjelva ute i havet merkar vi som regel ikkje på land, seier Atakan.

Han trur ikkje det vil bli rapportert om skader, og trur heller ikkje det vil kome nye skjelv.

— Ofte kjem jordskjelv i klyngjer, men lite som tyder på at vi vil få ei bølgje med fleire jordskjelv denne gongen.