Lothe har venta lenge på havarirapporten, som kjem neste veke. Heilt sidan den dramatiske tysdagsmorgonen på Stord for fem og eit halvt år sidan har han lurt på kva som var gale med flapsane som hindra nedbremsing av flyet, og kvifor den eine motoren rusa lenge etter at flyet var stoppa.

Eg hadde ikkje lyst, men tvang meg til det, og heldt kona i handa heile vegen

Jon Lothe, overlevande i flyulukka på Stord i 2006

— Først var det sjokk, så lurte eg på om dette var draum eller verkeleg, seier Jon Lothe, ein av tolv overlevande.

Flyhavariet kosta fire menneske livet i ein eksplosjonsarta brann i skråninga ved enden av flystripa på Stord lufthamn Sørstokken 10. oktober 2006.

Slutta med reisejobb

Vi står med automatikaren frå Bryne i enden av Sola flyplass der store og små fly landar og lettar i eitt kjør. Lothe slutta med reisejobbar etter ulukka, sterkt skeptisk til å gå om bord i fly igjen.

— Men to dagar etter ulukka tok eg fly heim frå Bergen og opphaldet på Haukeland sjukehus. Eg hadde ikkje lyst, men tvang meg til det, og heldt kona i handa heile vegen, seier Jon Lothe.

— Eg er blitt observant på kva flytype eg går om bord i. Aldri meir same sort som krasja, legg han til.

Like før ulukka sat Lothe og elleve andre Aker Kværner-arbeidarar om bord på Atlantic Airways-flyet av typen BAe 146 på veg frå Sola til Molde, med mellomlanding på Stord for å ta opp fleire jobbpendlarar til Ormen Lange-anlegget på Aukra. Jon Lothe las eit avisoppslag om trafikkulukker då flyet tok bakken på Stord lufthamn Sørstokken klokka 07.33 den småkalde oktobermorgonen i 2006. Straks merka han at flyet unormalt bukta seg bortover flystripa under nedbremsinga, deretter at landingslysa på enden av rullebanen brått forsvann under flyet.

«Ut! Ut!»

— Etter at det første sjokket hadde lagt seg, høyrde eg ein passasjer ropa «Ut! – Ut!» Døra framme hadde kilt seg, så vi sprang bakover i kabinen, der ei av flyvertinnene jobba med å opna ei dør. Rett før eg tok fart og hoppa ut, snudde eg meg og såg tjukk røyk koma bakover kabinen. Nede på bakken var eg heldig og slapp unna verste røyken og varmen frå den rusande motoren. Vi kravla oss nedover skråninga mot ein sti og fjerna oss frå vraket og den enorme varmen. Så høyrte vi kraftige smell, snudde oss og såg eldkuler stiga til vêrs.

— Adrenalinet i kroppen gjorde at eg ikkje merka noko til smerter der og då, dei kom to-tre timar seinare. I førstninga opplevdest det heile som uverkeleg, fortel 34-åringen.

Posttraumatisk

Etter å ha fått førstehjelp på flyplassterminalen og behandling på Stord og Haukeland sjukehus, kunne Lothe dra heim to dagar etter ulukka. Han hadde brannsår på ein øyreflipp og nokre fingrar, og var sjukmeldt

i nesten elleve månader med posttraumatisk stressyndrom. Det blei aldri eit rotasjonsopphald nummer to på Ormen Lange gassanlegg for Jon Lothe. Men i september 2007 var han i arbeid att, på Kværner-verftet i Egersund. Eit halvt år seinare slutta han i Aker Kværner Elektro for å jobba i Stavanger-distriktet for Schneider Electric.

Lothe og kona venta sitt første barn då ulukka skjedde. I april 2007 kom første jenta, og i vinter blei han pappa til dotter nummer to. Den nye familiesituasjonen var – saman med reaksjonar frå ulukka – medverkande til at Lothe ikkje lenger ville ha reisejobb.

Erstatningsoppgjeret er i hamn for alle Aker Kværner-arbeidarane som overlevde Stord-ulukka, men partane er blitt einige om ikkje å offentleggjera erstatningssummane.

UTBRENT: Av dette flyvraket greidde tolv menneske å redda seg ut, seks av dei med brannskader. ARKIVFOTO: RUNE NIELSEN