— Ho pleier å sitja der, seier Arthur Selstø og peikar mot ein knaus.

Telavåg-regnet piskar i andletet, og bølgjene slår mot den vesle båten til Selstø. Han speidar mot knausen nok ein gong. BT er invitert med på eksklusiv havørnsafari. Men i dag gjer ørnedronninga seg kostbar.

— Eg ser henne vanlegvis frå stoveglaset. Men i dag vil ho visst ikkje, seier han.

Dronninga har også ein make. Men han er mykje mindre enn henne, så det er ho som er sjefen.

To matfedre

Akvariedirektør og Telavåg-entusiast Kees Ekeli har mata ørneparet opp til tre gonger om dagen den siste tida. Det er jo ikkje havørn i Telavåg kvar dag.

Arthur Selstø har fulgt med på matinga frå stoveglaset. Det var sambygdingen Karsten Øvretveit som sette det heile i gang i fjor haust. Han har fiska mykje i området i alle år, og fekk plutseleg ein dag auga på ei svær havørn. Ein gong kasta han to fiskar på land til ørna, som ho straks sette nebbet i. Og då var det gjort.

Sidan den tid har Øvretveit og Ekeli, som har sommarhus i Telavåg, nærmast krangla om å mata ørneparet. Og rykta seier at det er ungar på gang. Minst éin, og kanskje to.

Vengespenn på 2,5 meter

No kjenner ørnene igjen båtane til både Ekeli og Øvretveit.

— Dei er heilt fantastiske. Ho-ørna er enormt svær, og har eit vengespenn på 2,5 meter. Eg er usikker på om dei hadde klart å overleva utan vår hjelp. I hovudsak er ørna eit åtseldyr. Ho klarer for eksempel ikkje å fanga fisk sjølv, fortel Ekeli.

Han er glad for at det no er havørn i Telavåg.

— Det gir ein ekstra dimensjon til det heile. Og havørna er ikkje farleg for barn eller sauer, som mange trur. Men ho et gjerne på lam som allereie er døde, seier han.

Var utrydningstruga

Ørne-ekspert Tore Wiers kan fortelja at mange jakta på havørn heilt fram til 1968, då rovfuglen blei freda fordi han var i ferd med å døy ut.

— Det var ikkje havørn på Vestlandet igjen før i 1986. Men no har me klart å byggja opp ein bestand. I Hordaland og Sogn og Fjordane har me rundt 230 ha-vørnpar, seier Wiers.

Han synest det er flott at folk får nær-kontakt med havørna.

— Det er positivt at fiskarar og andre får eit personleg forhold til fuglane. Havørnene klarer å kjenna igjen både båtar og folk, seier han.

Ørneparet har framleis ikkje fått namn. Har du eit godt forslag?

Her kan du besøke BT-båten

Silje Robinson