Dei tre i huset; Imre Svidal Løset (6), mora Ellen Svidal og kjærasten hennar, hoppa ut frå verandaen og berga seg frå flammane.

— Det var berre å hoppe ut. Eg var redd taket skulle rase ned, sa Ellen Svidal til Bergens Tidende i går kveld, nokre timar etter brannen.

Skjelven, men glad for at ho og familien berga livet.

To systrer mista heimen

På kort tid var huset deira, eit vertikalt delt bustadhus på Ålhus i Jølster, brent ned til grunnen.

I går ettermiddag stod berre skorsteinen igjen på den utbrende branntomta.

— Det var ei forferdeleg oppleving. Men familie og venner har vore eineståande, seier Ellen Svidal.

I går kveld var den vesle familien innlosjert hos guten sine besteforeldre, som bur like ved.

Svidal og familien fekk ikkje med seg noko ut då dei måtte rømme huset i full fart. I andre delen av det no nedbrende huset budde systera til Ellen og kjærasten hennar.

Dei var vekkreist då huset byrja å brenne, men var i går kveld på veg heim frå juleferie. Også dei miste alt dei eigde.

Hoppa ut

Seksåringen Imre sat og såg fjernsyn andre juledag då han høyrde nokre merkelege lydar.

— Han sa til meg at han høyrde lydar, det likna på dyr som krafsa på taket. Like etter kom han tilbake og sa at han trudde det var brann på taket. Då reagerte eg raskt, og sprang for å sjekke etter. Då såg eg flammane, fortel mora.

I full fart kom ho, sonen og kjærasten seg ut på verandaen i første etasje.

— Vi hoppa ut frå verandaen. Vi hadde ikkje tid til noko anna, seier Svidal.

Ingen av dei tre kom fysisk til skade. Etter kort tid var huset deira innhylla i flammar.

Uviss årsak

— Brannen blei meld klokka 12.20, og då vi kom til staden rundt 12.35 var huset heilt overtent, seier brannsjef Bjørn Anders Steinsund i Jølster brannvesen.

Brannfolka hadde ikkje mogelegheit til å redde huset. Rundt klokka 13.40 var brannen sløkt, men berre skorsteinen stod då igjen. Huset er bygd på 1950-talet med eit påbygg frå 70-talet. No var det under rehabilitering.

Ifølgje brannvesenet var det ikkje fare for spreiing til andre hus.

— Det er knappe femti meter til næraste hus, og vindretninga var gunstig, seier Steinsund.

Politiet veit førebels ikkje noko om brannårsaka. Onsdag startar truleg teknikarar frå politiet undersøkingar på branntomta.

MISTA ALT: Imre Svidal Løset (6) oppdaga flammane i taket. Han, mora Ellen Svidal ogkjærasten hennar berga seg ut av det brennande huset ved å hoppe frå verandaen. I gårvar dei innlosjert hos guten sine besteforeldre etter at dei mista alt.
Oddleiv Apneseth
- Huset var overtent da vi kom til, forteller brannsjef Bjørn Anders Steinsund i Jølster brannvesen. Foto: Per Marifjæren
Per Marifjæren
HUSET ER BORTE: Berre skorsteinen står att etter den dramatiske brannen i Jølster i går.
Oddleiv Apneseth