— Eg vil ikkje ta frå ungdommane sommerjobben, men denne jobben er det vel ingen som vil ha, seier pensjonisten Eivind Hystad (77) frå Stord til avisa Sunnhordland.

Han er inne i sin niande sesong som sommararbeidar hos Sunnhordland Interkommunale Miljøverk (SIM).

Jobben går ut på å hente inn øydelagde bossdunkar som vert erstatta med nye.

Arbeidet passar 77-åringen perfekt. Vegane i området kjenner han godt etter si tid som postmann i kommunen, ein jobb han hadde til han vart pensjonert som 65-åring.

Vil vere aktiv

Etter ein to års pause frå jobben hos SIM er han i sommer tilbake på vegane i Stord kommune, noko han trivst godt med.

Når dei er i gang er det opp mot 60 dunkar som skal skiftast ut. Før arbeidet starta var Hystad usikker på om kroppen ville tåle påkjenninga.

Det gjorde den heldigvis, for det er det fysiske 77-åringen likar aller best med å jobben.

— Eg likar ikkje så godt å sitje med mobil eller pc, forklarer Hystad.

Søk sommarjobb!

Hystad synest dei mellom ungdommen som ikkje tek seg sommarjobb har det for godt.

— Men dei fleste eg kjenner vil gjere ein innsats. Det er mykje lettare å søkja seg jobb seinare om du kan fortelja at du har hatt ein sommerjobb, seier den arbeidsomme pensjonisten.

Sjølv er han mellom 15 sommarvikarar hos SIM. Dei kan rapportere om veldig få søkjarar til sommarjobbar hos dei i år.

Nyt norsk sommar

Å jobbe framføre å nytte sommaren til å reise er naturleg for Hystad.

77-åringen ser ikkje noko grunn til å reise vekk frå den norske sommaren og nyter sola under arbeidet sitt rundt om kring på Stord.

— Kor skal du reise for å få det finare enn her, når det er fint vêr heime, spør han retorisk.

Når hausten kjem føl han etter sola, og skal nytte noko av ferielønna på ein to vekers tur til Spania.