Det var smale arbeidsvilkår då Thomas Endresen saman med fire andre murarar skulle ruste opp innsida av den gamle pipa på ullvarefabrikken i Ytre Arna tidligare i år. Med ein diameter på berre 1,3 meter, var det svært lite plass til å røre seg.

— Det var veldig trongt inne i pipa, og alt tok mykje lengre tid enn det elles ville tatt, seier Endresen.

Likevel fekk både stige, høgtrykksspylar og handverkar mirakuløst nok plass inne i den smale fabrikkpipa.

- Kom akkurat gjennom

Endresen, som seier han aldri har vore borti likanade oppdrag tidligare, hadde innsida av pipa som arbeidsplass i fleire veker.

— Det er bortimot den verste jobben eg har vore på, seier han.

Vi følte oss ikkje så veldig høge i hatten der oppe i høgda. Thomas Endresen.

For at handverkarane skulle kunne jobbe på innsida av pipa, vart det laga ei rekkje runde treplattformar som dei kunne stå på. Kvar plattform var samankopla av stigar.

— Vi kom oss berre akkurat gjennom plattformane når vi skulle opp og ned, fortel Endresen.

Det var langt ned til bakken på toppen av den 33 meter høge pipa.

— Vi følte oss ikkje så veldig høge i hatten der oppe i høgda, seier Endresen.

Jobben var hardt fysisk arbeid, og handverkarane måtte nytte tradisjonelle metodar i restaureringa.

— Kvar gong vi ville ha ein murstein, måtte vi heise den opp manuelt, seier han.

Haldt på å rase

Pipa, som i si tid blei brukt til bossbrenning, har ikkje vorte halda ved like sidan sidan slutten av 70-talet.

I tillegg til generelt forfall, fekk handverkarane seg ei overrasking då dei såg inn i pipa for første gong.

— Det var mellom 10 og 15 meter med røter og vegetasjon inne i pipa som måtte fjernast, seier Thomas Endresen.

Skaden på pipa var stor.

— Mange frykta at pipa skulle falle ned av seg sjølv, og var ei fare for lokalbefolkninga, seier Elna-Nini von Erpecom Dahl, som er dagleg leiar i Arna Industrihus A/S, og eigar av fabrikken. Ho bestemte seg for å ruste opp då ho arva fabrikken i 2009.

Oppussinga starta i august i fjor, og pipa stod klar for ein månad sidan. Sjølv etter restaurering er det derimot ikkje mykje som skal til før heile sulamitten rasar saman.

— Fabrikkpipa er er bygd inn i veggen på nabobygget, som det støttar seg på. Om vi riv bygget, må vi setje opp støtter for å halde pipa oppe, seier von Erpecom Dahl.