Sjå video øvst i saka!

Laurdag formiddag jobba dugnadsgjengen på spreng mot Kong Vinter. I frykt for regn og tung snø, rydda dei heile fire hyttetak på Wallemtunet leirstad på Kvamskogen.

— Det hadde vore veldig keisamt om taka rauk, fortel Arne Bjarte Lid.

Saman med seks-sju mann jobba han i kring fire timar med å tøma like mange tak for snø. Dugnadsgjengen hadde drege eins ærend opp for å ta seg av den massive snømengda..

Opptil halvannan meter hadde lagt seg på taka, meiner han.

— Mange hyttetak hadde veldig mykje snø. Nokre hytteeigarar hadde problem og var redd for at taket skulle falla saman, seier han.

Gamle hytter mest utsett

For tak eldre enn 50 år, kan ein halv meter snø vera nok til at taket vert skada, ifølgje Tryg forsikring.

Viss det vert meir enn éin meter snø på taket, er det fare på ferde - uansett kor ny hytta er, påpeikar kommunikasjonssjef Ole Irgens.

— Då må du rydda vekk snøen så fort som mogleg, seier han.

Berre ved Furedalen alpinanlegg på Kvamskogen meldast det om snømengder på kring 1,3 meter. Voss Resort har ei snødjupn på 2,1 meter, medan det i Myrkdalen skal ha kome opptil 2,4 meter med snø.

Opptil 50 tonn ekstra vekt

Éin meter snø på eit 100 kvadratmeter stort hyttetak, tilsvarer mellom 30 og 40 tonn ekstra vekt. Er snøen våt, snakkar ein gjerne om 50 tonn.

— Då kan konstruksjonen byrja å svikta. Faresignala er at dører og vinduer på hytta går treigt eller at det byrjar å knirka og smella i konstruksjonen, fortel Irgens.

Er du ein av dei som skal måka vekk snø frå taket, bør du hugsa på dette:

  • Pass på at du måkar jamnt for å unngå skeivt trykk
  • Ikkje fjern all snøen, men lat det vera att 10-20 centimeter. Då skadar du ikkje taktekkinga.
  • Start med ryddinga frå mønet og ikkje nedanifrå. Forsikringa vil som hovudregel dekkja skadar som oppstår på grunn av snølast. Men veit du at det er snødd mykje og du ventar for lenge med å rydda taket, kan utbetalinga verta redusert.

— Som hytteeigar har du plikt til å halda taket rydda for snø, seier Irgens.

- Lempa snøen av taket

Den siste tida har det vore usedvanlege mengder med snøfall i fjellområda på Vestlandet. Norges vassdrags- og energidirektorat (NVE) har allereie varsla stor snøskredfare sundag.

Dugnadsgjengen på Kvamskogen nytte godt av mildvéret som luskar. Sidan snøen var sopass våt, kunne dei ved hjelp av måka skjæra ut store blokker med snø.

— Deretter var det berre å køyra måka inn i snøen og lempa det heile av taket, seier han.