Mandag føremiddag drog 28 Skeie-supporterar frå Stord og Fitjar til den franske matbyen for å sjå Geir Skeie forsvara stolte norske tradisjonar i Bocuse d’Or, rekna som den uoffisielle verdsmeisterskapen i kokkekunst.

Tirsdag følgjer Fitjar-ordførar Harald Rydland (Sp) etter i eit charterfly fullt av gastronomientusiastar.

– Han er sta

– Det blir fantastisk om han vinn. Me håpar på det, seier Margareth Tislesvoll og Solveig Thomassen, naboar av Geir Skeie, og lærarar ved Fitjar vidaregåande skule der 28-åringen gjekk på kokkelina for ti år sidan.

– Det var noko spesielt med han. Det var ein kar som visste kva han ville, hugsar Sigmund Hopperstad (64) om sin tidlegare elev på kokkelina. Den pensjonerte læraren frå Fitjar er på plass i Lyon når Geir Skeie konkurrerer.

– Geir er sta, han har sine eigne meiningar. Slik må ein vera for å nå så langt, seier Hopperstad.

Norsk fest

Iført kvite Bocuse d’Or-jakker med Skeie-logo drog Fitjar-gjengen via Flesland til Frankrike mandag morgon. I bagasjen var det kokkeluer og norske flagg, slik at den norske kontingenten kan gjera seg gjeldande under konkurransane.

Geir Skeie skal i elden på konkurransens andre dag, onsdag. Samme ettermiddag feller den kresne juryen endeleg dom. Uansett plassering for Skeie blir det norsk fest etterpå, og der får Fitjar-gjengen delta og møta kjøkenhelten sin.

Geir Skeie er i dag kjøkensjef på Midtåsen Solvold i Sandefjord. Han blei Årets kokk i Noreg i 2007, og vann Bocuse d’Or Europa i Stavanger i fjor.

Torsk og storfe

I Lyon må dei i alt 24 deltakarane laga ein fiskerett og ein kjøtrett kvar. Fiske-retten må innehalda norsk kamskjell, torsk og reker, kjøtretten må baserast på Angus Aberdeen storfe.

Geir Skeie kallar fiskeretten sin «Sandefjord», kjøtretten ber Fitjar-namnet «Sæterbø».

Norske kokkar har tre gonger gått til topps i Bocuse d’Or, innstifta av Paul Bocuse i 1987; Bent Stiansen (1993), Terje Ness (1999) og Charles Tjessem (2003).

OVE OLDERKJÆR
Bjelland, Håvard