Tortilla med hakkasteik som hovudinnhald, gjekk til topps i Hakkasteik-tevlinga som Voss Kjøttindustri har skipa til. Oppskrifta er sendt inn av Harald Skjoldal i Bergen.

— Retten hadde kanskje vorte enda betre med potetkake eller krotakake, seier juryformann Gunnar Nagel Dahl til Bergens Tidende.

Han sakna også raudbetar i oppskriftene.

Folkejuryen kom til andre resultat enn ekspertane under prøvesmakinga i Vestnorsk Kulturakademi sine lokale på Tvildemoen i går.

Hakkasteik med sjampinjongsaus, med eller utan pommes frites, var blant favorittane. Likeins hakkasteik med bakt potet og vokka grønsaker og hakkasteik med grønsaker, mest løk, på grillspyd.

— Problemet med desse rettane er at det ikkje er mogeleg å laga dei etter dei innsende oppskriftene, seier Nagel Dahl.

Etter oppskriftene skulle retten ha varm hakkasteik forma som boller eller kaker. Det går ikkje. Dei går i oppløysing under koking eller steiking. Men til testen på akademiet i går, gjorde kokkeelevane ved Rogne vidaregående skule ein vri. Dei serverte varm hakkasteik i aluminiumsbeger på den fint danderte tallerkenen. Dermed var suksessen sikra i folkejuryen. Men fagfolka vende tommelen ned grunna avviket frå oppskrifta. Ingen premie.

Andrepremien gjekk til Solveig Skjoldal, Bergen, for ein hakkasteiksalat. Kalde, små bollar av hakkasteik let seg forma. Marielle Follo frå Odda vann tredjepremien med ein risotto.

Rogne-elevane, som har jobba med tillaginga i samarbeid med Vestlandske Kulturakademi, har sjølv lansert idear som Hakkasteik i kålrulettar og lasagne, utanom tevlinga. Slike tips noterte dagleg leiar i Voss Kjøttindustri, Bjarte Tolaas, seg. Han er svært nøgd med responsen på tevlinga som har vore utlyst over internett og med brosjyrar i butikkane.

Bygg-gryn og opphakka salt røykekjøt er hovudingrediensar i hakkasteik, ein matrett med lange tradisjonar i Hardanger. Namnet brurasteik kjem truleg av at retten vart mykje nytta i bryllaup, anten som nattmat eller som hovudrett andre dagen i eit tredagarsbryllaup.

Tolaas avlivar gjerne myten om at hakkasteik er feit mat. Feittinnhaldet er berre sju prosent i hakkasteika dei framstiller kommersielt på Vossestrand.

TRADISJONSMAT: Hakkasteik i mange nye varianter. Ekspertpaneler i framgrunnen. Kokkeelevar i bakgrunnen. Akademileiar Tanja Gilbakken til venstre.
Foto: Arne Hofseth