— Me er kanskje ikkje så unike. Men me er stolte og synest det er knakande gøy, seier festivalsjef Sigvard Madsen (30).

Leiaren for årets Tysnesfest og dei seks føregåande er høgt og lågt.

Femten ungdommar har malt bilane sine slik, heilt frivillig

På festivalkontoret i Våge tek han imot folk og telefonar i eitt kjør, han er innom salsbua for festivaleffektar, og skriv ein epostinstruks om korleis svenskeartisten Eric Saade må ha spesialtransport frå Flesland til Tysnes for å nå konsertstarten.

500 båtar

Med telefonen på øyret spring Madsen ned på kaien og heng opp eit banner som viser veg til publikumstoaletta. I hamna har det alt samla seg fleire hundre småbåtar. Folk har trekt opp på flybridgen i bar overkropp for å nyta mat og drikke. Laurdag vil det vera nær 500 båtar her. Kvar gong ferja frå Halhjem legg til kai er det eit trafikalt kaos i Våge. Laurdag er det marknad og endå tettare, ifølgje lensmann Lorentz Lunde.

— Eg må køyra ein vaskemaskin til Uggdal, der artistane overnattar. Bli med, seier Sigvard Madsen, til dagleg kaptein på Norled-ferjer og -snøggbåtar. Kvar sommar ordnar han seg ein ekstra lang samanhengande friperiode for å ta seg av Tysnesfest.

Tysnesfest1.jpg
Tysnesfest3.jpg
MARIE HAVNEN

— Sjå den bilen, seier han og peikar på ein eldre kabriolet av ei folkevognsboble, skinande nymåla i Tysnesfest-fargane blå og kvit.

— Femten ungdommar har malt bilane sine slik, heilt frivillig. Det er det eg er oppteken av, at det skapar engasjement og identitet. Det er det som skal til for å få utflytta tysnesingar til å koma heim att, seier Madsen.

— Me har så mange flinke grupper i arbeid, nokre ungdommar står på fjorten dagar nesten i strekk til langt på kveld. Å finna løysingar, det er det som er kjekt, seier han.

Festivalcampen

Med festivalsjefen bak rattet passerer me Uggdal, der Madsen og ein kamerat har kjøpt det tidlegare bankbygget gjennom eit felles bustadselskap.

— Der er festivalcampen i år, seier han og peikar på motsett side av vegen. I enden av ei lang rekkje med campingvogner og telt ser me tre damer og ein kar driva sakte rundt i ein liten gummibåt på vatnet.

— Dette er fjerde året vårt. Me kjem fordi det er ekstremt gøy, me blir aldri skuffa og har fullt festivalpass. Ein godt gjennomført festival, seier Anne-Lise Heggland (27) og Lena Lyssand (23) frå Os.

Tysnesfest skiltar med kjende artistnamn også i år – Europe, Vamp, Hellbillies, Madcon, Morten Abel, Wenche Myhre, Datarock og Bo Kaspers med fleire – og trekkjer publikum frå store deler av Sunnhordland, Midthordland og Bergen.

— Også frå utlandet, faktisk. Blant anna for å høyra og sjå Samantha Fox, fortel Sigvard Madsen.

Halv million i pluss

Etter å ha avlevert vaskemaskinen, gjer Madsen nok ein stopp på tilbaketuren.

— Dette må de sjå, seier han og leier oss bort til ein utescene i Uggdal. Dress- og hattekledde Anders og Marcus Dalland sitt band spelar idet rundturbussen deira har gjort ein mellomstopp. Den "elleville o-fagtimen" med bussturen rundt Tysnes er eitt av suksessarrangementa som har oppstått rundt konsertane på festivalen.

Før me er tilbake ved festivalkontoret, svingar Sigvard Madsen stolt bortom hovudscenane på Gjerstad, der fem-seks tusen menneske er samla på kveldskonsertane.

— Me brukar 1,2 millionar kroner på lyd og lys, og 600.000 kroner på tryggleik, seier han. Av 11 millionar kroner omsett i fjor, var overskotet på knapt ein halv million. I tillegg delte festivalen ut 250.000 kroner til lag og organisasjonar på Tysnes som stiller opp på dugnad.

— Me ønskjer å ha det gøy, skapa ein folkefest og visa fram øya vår. Er ikkje det bra då? spør Sigvard Madsen og hastar vidare til nye sjefsoppgåver.

SJEFEN: Sigvard Madsen (30) trekkjer i mange trådar for Tysnesfest, men rundt 600 frivillige øybuarar bidreg under festivalen som trekkjer over 20.000 menneske til Tysnes denne helga.