• Dårleg resultat i heimfylket vil svekke Navarsete som leiar i Senterpartiet, seier valekspert.

Førde: Valkommentator Knut Henning Grepstad meiner eit av dei mest interessante tinga å følgje med under kveldens valoppteljing er korleis det går med Senterpartiet i Sogn og Fjordane, som er heimfylket til partileiar Liv Signe Navarsete.

— Gjer Senterpartiet eit dårleg val her, kan det svekke hennar posisjon som partileiar, seier Grepstad, som tradisjonen tru følgjer valkvelden saman med partitoppane i fylket på valvaka på Sunnfjord hotel i Førde.

Dei siste målingane tyder på at Navarsete sjølv er sikra eit av dei tre distriktsmandata frå Sogn og Fjordane.

På dei siste målingane ligg partiet på rundt 20 prosent, og Grepstad seier Senterpartiet har tradisjonar for å mobilisere godt i valkampen i Sogn og Fjordane.

Men eit resultat på 20 prosent er likevel ein solid nedtur frå valet i 2009, då partiet kapra 25,2 prosent av røystene i Sogn og Fjordane.