Johnny Lund frå Os nøydde seg ikkje med å ta sesongens første fisk i Oselvo. No har han óg halt inn den største.

Småpene 14,3 kg vog monsterlaksen Lund drog opp torsdag denne veka. Det var Midtsiden som først omtala saka om den store fisken.

I rekordvarmen var det ein kamp å å få fisken på land.

— Eg satt der oppe og fiska. Egentlig var eg tenkt til å reise heim, for det var jo så varmt og eg sat midt i solsteiken.

Det gjorde han heldigvis ikkje, og like etter nappa det i snøret som aldri før.

Kjempenes kamp

— Eg kjende med ein gong at det var ein stor fisk.

Ein slik kjempe let seg ikkje enkelt hale inn. Lund måtte gå fleire runder med fisken i elva før han hadde utmatta han nok til å kunne lande den.

— Eg sprang på nedsida av fisken og fekk jaga den opp i ein pøl. Herfrå symde den gjentekne gonger forbi meg før den stilte seg inntil samme sida som eg stod. Til slutt fekk eg pressa den opp i overflata og fekk fisken på land.

Han reknar kampen for å sikre fangsta pågjekk i omlag eit kvarter. Ruggen gjekk frå fridommen i elva til fotografering og så rett i fryseren, der den venter på å bli røykelaks til jul. — Her blir det nok til svigerforeldre, søsken, ja, stort sett alle som vil ha, seier Lund.

Rett stad til rett tid

Den nøkterne osingen meiner fiskelykka han har hatt stort sett handlar om å vere på rett stad til rett tid. Han meiner òg fisken var litt grei med han.

— Det var ein snill fisk. Viss rugger på denne størrelsen verkeleg kjemper greier ein ikkje å få dei inn. Det var gale nok å få denne opp. og den var av den rolege typen, seier Lund.

Han var i det heile overraska over at fisken beit i varmen.— Igår var der for å fiske att, men då enda eg berre opp med å bada sjølv istadenfor. Med rundt 20 grader i vatnet bit fisken vanlegvis dårleg, seier fiskaren.

Lund ser ikkje bort frå at han kjem til å ta fleire fiskar på same storleiken i løpet av sommaren.

Den største fisken som har blitt teke i Oselva i nyare tid var på omlag 18 kg og vart teken i fjor.