Frå morgonen av var barnetrekket i Myrkdalen einaste skiheis i drift. Vinden var for kraftig på toppen til forsvarleg drift av dei lange trekka.

Dei mest ivrige tok skia på nakken og gjekk eit stykke opp i Bygardslia til fots. Dermed nådde dei i fine løyper og laussnø i nedre del av området. Den flunkande nye varmestova fekk godt med besøk fram til heisane opna utpå dagen.

I mellomtida hadde Voss Fjellheisar sett Hangursbanen og Hangursheisen i drift. Vinden løya såpass at også løypene på Tråstølen og Slettafjellet kunne settast i stand til ettermiddagsbruk. Idrettslaga fekk trekk og løype på Myra klare til alpintrening ved lunsjtider.

Den nye ekspressheisen til 37 millionar kroner hadde sin første ordinære arbeidsdag laurdag. Folk kunne ta heisen både opp og ned att. Det er no så vidt snø nok til å ta seg ned til Bavallen på ski, men ikkje utan vanskar, og Fjellheisane tilbyr skyss med nyeheisen i tillegg til Hangursbanen.

Under dei rådande vêrtilhøva i går, kom ikkje stasheisen i drift før det nærma seg stengetid.

Arne Hofseth