Kraftig uvêr gjer at Filefjell er den einaste fjellovergangen med vanleg ferdsel mellom Vest— og Austlandet.

— Det er veldig kraftig vind, i tillegg til at det er nedbør. Hardangervidda, Hol-Aurland, Årdal-Tyin og Haukeli er stengt, medan det er kolonnekøyring over Hemsedal og Strynefjellet, seier trafikkoperatør Morten Hansen på Vegtrafikksentralen Region Vest.

Ulykke på stengt veg

Midt i uvêret har det vore ei trafikkulykke på fylkesveg 50, mellom Hol og Aurland. Vegen vart stengt på grunn av kraftig vind og nedbør klokka 17.39, men ein time seinare er framleis bilane som var involvert i samanstøytet ikkje henta ned, ifølgje politiet.

— Ein brøytebil har vore borti ein personbil, og det har truleg ført til at ein andre bil har blitt skadd. Ein person skal ha hovudsmerter, seier operasjonsleiar Nils Erik Eggen ved Sogn og Fjordane politidistrikt.

Køyrd til sjukehus

— Vi har ein patrulje frå Indre Sogn på staden. I tillegg er det ein ambulanse der, seier Eggen.

I 19-30-tida har òg ein bergingsbil kome til staden, og jobbar for å få frakta vekk den skadde bilen.

— Den skadde personen er køyrd til Lærdal sjukehuset. Det blir rekna med at han er lettare skadd, seier operatør Espen Gulliksen ved Sogn og Fjordane politidistrikt.

STENGT: I 19.15-tida dreiv politi og bergingsmannskap med å hente ned bilane som kolliderte med ein brøytebil i Vestredalen, på den stengte fjellovergangen mellom Hol og Aurland. Kraftig uvêr stengjer fredag kveld ei rekkje fjellovergangar mellom Aust- og Vestlandet.
Webkamera: Statens Vegvesen