Ferja MF «Svanøy» mista både motorkraft og styring då ho skulle leggje til kai ved Oppedal på sørsida av Sognefjorden fredag ettermiddag. Det endte med eit hardt møte med ferjekaien.

Det viktige ferjesambandet på E39 vart innstilt i begge retningar. Trafikken vart gjenopptatt kl. 17.30.

— MF «Svanøy» ser ut til å ha fått ein skade på ein fall-lem. Vi må få undersøkt denne før ferja legg frå. Vi håpar å kunne opne sambandet att om ein times tid, sa kommunikasjonsdirektør Ingrid Færøyvik i Fjord 1 kl. 17.10.

På sommaren går det normalt tre ferjer mellom Oppedal og Lavik.

— Nå vil det bli to ferjer inntil vidare. MF «Svanøy» vil bli tatt ut av drift. Dette er normalt sett eit trafikkert samband, og fredag ettermiddag er ikkje eit ideelt tidspunkt for eit slik uhell, seier Færøyvik.

Torsdag skjedde eit liknande uhell på Brimnes i Hardanger, då ferja frå Bruravik kolliderte med kaien. Der måtte Fjord1-ferja MF «Gulen» setjast ut av drift på grunn av skader.