Ubåten ved Fedje — U 864 - hadde ei last på 65 tonn metallisk kvikksølv då den gjekk til botnars.

På grunn av faren for kvikksølvforgifting åtvarar Mattilsynet mot å ete fisk som er fiska nær vraket, og i haust skal Kystverket undersøkje korleis kvikksølvproblemet skal løysast. Både heving og tildekking av vraket blir vurdert, men i mellomtida vil Kystverket at folk og fiskebåtar held seg unna.

Fiske- ankring og dykkeforbodet blir gjeldande inntil vidare, medan ferdselsforbodet innanfor 500 meter frå vraket skal gjelde når det vert arbeidd med vraket.

— Dette går smertefritt. Det er lite kontroversielt og det er jo i eit avgrensa tidsrom, seier Fedjeordførar Erling Walderhaug. Så lite omstridt er framlegget at Walderhaug reknar med magert oppmøte når Kystverket skal orientere om forbodet på Fedje i dag.

U 864 vart oppdaga i 2003. Hausten i fjor stadfesta undersøkingar med miniubåt at den hadde behaldarar med kvikksølv om bord.