Med sine 193 centimeter over bakken er Tom Harestad ingen smågut. Men laurdag føremiddag fekk han ein fisk som var lengre enn seg sjølv, og som hadde turbokrefter.

Det var med skrekkblanda fryd han drog rusa med fisken oppi båten.

— Rusa var usedvanleg tung, slik sett var eg førebudd på at det kunne vera storfangst. Men at det skulle vera ein gedigen havål, nei, det hadde eg aldri trudd, fortel Harestad om den uvanlege fangsten.

Havålfiske er nemleg ikkje for feigingar. Munnen er rikt utstyrt med sylkvasse tenner, og kappar fingrar like lett som me knekkjer fyrstikker.

Individet som var hamna i Harestad si ruse var 2 meter lang og vog rundt 35 kilo. Fisken vrei og bukta seg, og trua med å sprengja heile rusa. For Tom Harestad blei det ein utfordrande match å få rusa om bord i båten og deretter opp på kaien og inn på land.

Spennande

Han var ikkje åleine om den spesielle opplevinga. Også kona Åse og sonen Petter på 10 år fekk med seg den spennande rusetrekkinga.

— Me blei meir eller mindre sjokka alle tre då me forstod at det var ein diger fisk som fylte heile rusa. Fisken var grå på farge, og verka oppblåst og aggressiv. Som om det var sjøormen frå Lock Ness me hadde med å gjera, fortel familiefaren.

Han våga ikkje sleppa fisken laus i båten. Vel inne på land blei fisken flytta over i ein balje med sjøvatn.

Slept fri Harestad er ein ivrig sportsfiskar, men har aldri vore borti liknande fangst. Han var heller ikkje sikker på kva fisk han hadde med å gjera før han kom i land og fekk sjekka på internett.

Havål har ikkje tradisjon som matfisk på våre kantar. Familien Harestad bestemte seg for å sleppa fisken fri, men sjølvsagt ikkje før han var foreviga med Vestavind sitt kamera.

I ettertid vil familien Harestad hugsa den spesielle fisketuren så lenge dei lever. Randaberg-familien kjøpte hytte på Fagerland for halvtanna år sidan, dei stortrives med sjøen som nærmaste nabo. No har dei fått ei uvanleg fiskehistorie å fortelja vidare.

Kari Haukås