PER MARIFJÆRENODDLEIV APNESETH (foto)per.marifjaeren@bt.no

Meir nasjonalromantikk enn 17. maitoget gjennom dei storslåtte omgjevnadene Fjærland skal ein truleg leite ei stund etter.

Dermed fekk dei 582 tyske passasjerane om bord på turistskipet «Amadea» full valuta for pengane.

— Ikkje opplevd tidlegare

— Dei fleste av passasjerane våre har nok aldri sett denne feiringa før. Det er flott, seier turguide om bord på «Amadea», Katja Horstmann.

Ho ser på skulemusikken og bunadskledde småbarn viftande med norske flagg idet toget går gjennom Mundal sentrum. Rundt omkring svermar fotograferande og peikande tyskarar.

— Wunderschön. Absolut wunderschön, mumlar dei ivrig fotograferande gjestene.

Skipet gjekk frå Hamburg for nokre dagar sidan, og ankra opp i Fjærlandsfjorden ved 10-tida på nasjonalformiddagen.

Dei fleste om bord nytta høvet til ein tur i land, og eit par hundre av dei tok turen oppom bremuseet.

Nasjonalsongen

— Vi brukar å ha med hest og kjerre i toget vårt, men i år vart det eit unntak. Litt synd når det er så mykje besøk, meiner ein bunadskledd Knut P. Bøyum.

Han smett ut av toget og hastar av stad for å få eit bilde av dei bunadskledde damene fremst i flaggborga.

— Stå no i ro litt, så eg får eit bilde, ropar han til dei.

Dei ler, men kan naturlegvis ikkje stoppe.

— Så mykje kvinnfolk på eitt bilde, det er flott, smiler Bøyum nøgd etterpå.

Toget stoppar deretter på plassen mellom butikken og eldresenteret, og dei gamle på balkongen får høyre Fjærland skulemusikk framføre nasjonalsongen.

Ute på det grøne brevatnet i fjorden kneisar «Amadea» framfor dei mektige fjella.

Krigsminnet

Før ferda går vidare til skuleplassen med tale, leikar, mat og anna program, skal toget ta ein liten, men viktig omveg.

Flaggborg, fane og musikk går til høgre opp til Fjærland kyrkje, der det skal leggast krans på ei grav.

Minnesteinen er korkje stor eller prangande, men den er sentralt plassert på kyrkjegarden. Det er grava til Georg Distad, fjærlending som fall i kampane i Valdres i aprildagane 1940.

Det er 14 år gamle Trude Øygard som seier dei få minneorda og legg blomane på grava.

Deretter eitt minutt stille.

Så marsjerer fjærlandsfolket til dempa taktslag mot skuleplassen og vidare feiring av nasjonaldagen.

Og til kvelden er det fest på bygdehuset, tradisjonen tru.

Ute på fjorden er dei tyske passasjerane frakta tilbake til skipet. Det er lunchtid om bord.

«Amadea» av Nassau, med sine 582 tyske passasjerar som slumpa til å besøke Fjærland nettopp på denne maidagen.