• No blir me indrefileten i Tysnes, seier ein oppglødd øybuar.

Fredag vart det klart at regjeringa går for den såkalla midtre traseen for ny E39 sør for Bergen. Samferdselsminister Ketil Solvik-Olsen presenterte planane, som inneber bru over Bjørnafjorden.

Kortare tid

Det er godt nytt for dei om lag 150 innbyggjarane på øya Reksteren i Tysnes kommune.

— I dag bruker me to timar til Bergen. I framtida vil det kan hende berre bli 20 minutt, seier Ole Christian Kjerrgård.

Han er lokalpolitikar for Senterpartiet og ein av dei som har teke initiativ til feiringa laurdag.

Samlast på nærbutikken

Ordførar Kjetil Hestad (Ap) held ein appell og folk er invitert til å samlast ved nærbutikken for å markere skiftet.

— I går var ein merkedag. Me er ein utkant, no blir me indrefileten, i alle fall i denne kommunen, seier Kjerrgård.

Brua over Bjørnafjorden syt for at E39 i framtida går gjennom Reksteren. Han seier at han forstår at dei som «tapte slaget» no er lei seg.

— Men eg håpar me kan bruke kreftene på å finne gode løysingar, seier han.