Ambulanse, politi og brannmannskap rykka ut etter melding om frontkollisjon mellom bil og buss på riksvei 52 ved Breistøl i Lærdal kommune. Politiet blei varsla om trafikkulukka klokka 14.55.

— Det er opplyst at ei kvinne er skadd. Ho sit fast i personbilen. Det foregår redningsarbeid på staden, sa Inge Værøy, operasjonsleiar i Sogn og Fjordane politidistrikt rett etter ulukka.

Sat fastklemt

Kvinna sat fast i bilen i over ein time før redningsmannskapa fekk ho laus. Ho vart då sendt med luftambulanse til sentralsjukehuset i Førde.

Den skadde kvinna er i 86 år gamal. Kvinna vart seint fredag kveld flydd til Haukeland universitetssjukehus. Akuttmottaket oppplyste at kvinna var alvorleg skadd.

Laurdag formiddag opplyser sjukehuset at kvinna kun har lettare skader. Ho blir operert i løpet av dagen.

Kolliderte med turistbuss

Kvinna var åleine i bilen da ulukka skjedde. I turistbussen ho kolliderte med var det 43 personar, inklusiv førar. Ingen i bussen vart skadde, og ein ny buss kom til staden for å ta hand om turistane.

Vegen vart stengd etter ulukka. I 17-tida var det framleis manuell dirigering på staden.

Årsaka til ulukka er ikkje kjend. Ulukka vert etterforska vidare ved Lærdal lensmannskontor.