For tre år sidan søkte Marit Hammatti Langhelle (53) familiegjenforeining med ektemannen, 27 år gamle El Hassan Hammatti frå Marokko. I mars 2011 gav Utlendingsdirektoratet (UDI) avslag på søknaden, fordi dei meinte ekteskapet ikkje var ekte. Ekteparet har kjempa med nebb og klør for å snu vedtaket.

På fredag kom gladmeldinga frå Utlendingsnemnda: Hammatti får kome til landet likevel.

— Det har endå ikkje gått opp for meg. Eg har aldri grine så mykje i mitt liv. Hadde du visst kor mange gonger eg har sett på vedtaket, seier Langhelle.

Ekstasen var ikkje mindre hos Eli Hassan Hammatti.

— Han trur det ikkje framleis. Først trudde han eg tulla med han, seier ho.

- Gjekk ned 40 kilo

Langhelle legg ikkje skjul på at det har vore ein lang veg å gå for dei to.

— Dei tre åra vi har kjempa, har lufta gått heilt ut av meg. Eg gjekk ned 40 kilo berre på stress, seier ho.

På grunn av dei store avstandane, har paret berre kunne møtast i det verkelege liv ein gong i året.

— Det har vore grufullt. Det einaste vi har hatt til å halde ekteskapet ved like er Skype. Det har vore mange lange netter, og mange tårer, seier ho.

Kunne smugle inn

Grunnen til UDI sitt originale avslag, var at dei meinte ekteskapet var eit såkalla proformaekteskap, som berre er inngått for å skaffe søkjaren opphald i Noreg.

Det har vore ei lang reise for Marit og El Hassan. På vegen fekk dei mellom anna tilbod om å smugle Hammatti til Noreg via Sverige, men det ville dei ikkje.

— Vi gjekk den lange vegen, og det lønte seg. Vi ville bli trudd, og visste vi snakka sant, seier ho.

- Ser lyst ut

Då BT tok kontakt med Langhelle, var El Hassan Hammatti på ambassaden for å skaffe seg visum. Og dei to har ikkje planar om å utsetje gjenforeininga lengre enn nødvendig. Hammatti kjem nemleg til landet allereie i sommar.

— Eg har ikkje tenkt å dra han opp hit midt på svarte vinteren. Eg har ikkje planar om å skremme han så fælt, seier Langhelle spøkjefullt.

Med det same han kjem til landet, skal Hammatti i gang med norskundervisning. Deretter ber det til politiet for å få arbeidsløyve.

— Framtida ser lys ut, og vi har planar om å fornye ekteskapsløftet her i Noreg, seier Langhelle.

VIL TIL ØYGARDEN: El Hassan Hammattis største ønske er å bo med konen Marit i Øygarden. - Jeg vil ikke leve uten henne, sier han.
Privat