• Det høyrest ut som om dei syng «stay away, stay away, stay away».

— Både eg og andre har prøvd å komme igjenom til kundeservice heile veka. Dei seier til dømes du er nummer tre i køen og det er 20 minutter att å vente, men så bryt det, eller så får du plutselig høyre at det er 20 nye minutt å vente, seier Karl Henrik Nesse.

Han kan fortelje at både han og naboar i den vesle bygda Skauge i Lindås kommune har tilbragt mykje tid i telfonkøar til breidbandsleverandøren den siste veka, men utan resultat.

Dei har vore utan nett sidan før helga, og har framleis ingen datakontakt med omverda.

Total kollaps

Nesse og dei andre bebuarane i bygda tek til å verte mektig lei av leverandøren Breiband.no.

Det var dette selskapet, tidlegare kjend som Direct Connect, som vart anbefala av ei arbeidsgruppe i Lindås Kommune då Skauge skulle få breidband.

Trøbbelet med tilkoplinga har i følgje Nesse vedvart over fleire år.

— Vi har hatt større og mindre problem heile vegen, men no har det altså kollapsa heilt, seier Nesse.

Nettilkoplinga til bygda vert levert gjennom satelitt til ein mottakar på eit av husa, som så sender signalet videre til dei andre bustadane. Når denne er nede, mister alle internettet.

«Stay away»

— Du får ein song som går på repeat, der det høyrest ut som om dei syng «stay away, stay away, stay away» heilt til det bryt. Det er nesten så ein trur dei ikkje ønsker å hjelpe oss, seier Nesse.

BT kan trygge han på at det ikkje er «stay away», men teksten «sail away» frå artisten Enya sin song med same namn som vert repetert på selskapets kundetelefon.

Daglig leiar og pressevakt i Breiband.no er på ferie til neste veke. Etter i overkant av en halvtime i telefonkø hjå kundeservice, på andre forsøk, kom BTs journalist gjennom til ei hyggelig svensk dame som kunne svare på spørsmål.

Ho kunne opplyse om at selskapet har hatt kapasitetsproblemer denne veka og at det er feil med kontakten med mottakaren på Skauge. Dei skal no skal sjå kva dei kan gjere for å hjelpe den nettlause bygda. Seinare same dag fekk Nesse og dei andre ein sms frå selskapet om at dei ser på saka.

— Det er vi svært takksame for, seier Nesse.