— Seglbåten har eit tysk flagg i hekken. Vi reknar med at det er ein samanheng mellom den tomme båten og personen vi har funne, seier operasjonsleiar Jarle Utne Reitan hos politiet. Det var NRK som først meldte om funnet.

Politiet fekk melding kl. 15.27 om at ein død person flaut i sjøen ved Litla Ulvesøya, vest for Siggjo i Bømlo.

— Ein person som var ute i båt meldte frå. Han hadde reagert på at ein hund stod og gøydde i seglbåten, som verka tom. Han gjekk inntil, og såg då den døde personen i sjøen ca. 30 meter unna, inn mot land, seier Reitan.

Politiet kjenner ennå ikkje til identiteten til den omkomne, eller korleis han hamna i sjøen.

— Han vil bli obdusert. Vi leitar nå også igjennom båten. Førebels veit vi ikkje kven som eig båten, seier Reitan. Han seier den døde bar preg av å ha vore lenge i sjøen. Han vart henta opp med hjelp frå brannvesenet.

— Seglbåten vil bli sikra, og hunden er tatt hand om, seier Reitan.