— Påkosta, seier Gøril Guddal (51). Meir presist ønskjer ikkje gardseigaren og galleristen i Kvinnherad å omtala kostnaden med å opprusta det historiske Guddalstunet i Kvinnherad til eit topp moderne kunstgalleri med serveringslokale. Men andre enn ho sjølv har sett potensialet i tiltaket, for Innovasjon Norge og ein privat sponsor har skote inn pene summar.

Etter 20 år midt i turiststraumen i Rosendal sentrum har Gøril Guddal flytta galleriet sitt til heimegarden nesten øvst i dalen fem kilometer lengre sør. Om lag eit halvt tusen menneske møtte fram på nyopninga Kristi himmelfartsdag. Der var utstillar Håkon Gullvåg hovudattraksjon ved sida av det idylliske tunet.

-Er fjetra

— Det har vore ei interesse langt større enn eg rekna med. Eg er fjetra. Folk kjem langvegs frå. Og kunstnarar ringjer for å få stilla ut, seier gardsjenta som blei gallerist ved eit tilfelle.

Løa med eldste delen frå 1890-talet, er blitt til eit 200 kvadratmeter stort galleri der halvparten utgjer sjølve utstillingsarealet med overlys frå taket og det siste innan kunstig lys. Etter Gullvåg blir veggene rydda for Pushwagners sterke bilete i juli og august.

Guddalstunet i dalen ovanfor Seimsfoss har lange tradisjonar, og er omtalt alt i Snorresagaen. Fram til 1900 var garden samla som eit klyngjetun med ni bruk og 54 hus. Av det gamle tunet står i dag eldhuset frå 1700-talet og eit stabbur frå rundt 1850.

Ut av baroniet

Gørils besteforeldre kjøpte garden av Baroniet Rosendal i 1930, og for fem år sidan kjøpte ho sjølv garden av foreldra Kirsten og Johannes, som begge bur her framleis og er delaktige i drifta.

Guddalstunet er av Kirsten og Johannes G. Guddal nytta til gardsturisme, og anlegget blei i 1993 tildelt Norsk Kulturarv sitt kvalitetsmerke, Olavsrosa. I eit 140 år gammalt vestlandshus som blei flytta til garden frå Rosendal for 14 år sidan, tilbyr Galleri G Guddal servering i hovudetasjen og overnatting på lemen.

Gøril Guddal er eigentleg utdanna bibliotekar, men blei kasta inn i galleribransjen av ein invitasjon til å stå for utstillinga under Rosendal musikkfestival i 1993. Det som starta i Snikkeriet overfor rådhuset, heldt fem år seinare fram ved rutekaien i Rosendal sentrum.

Til barndomsheimen

Ei planlagt ombygging av lokala i Rosendal drog ut, og dermed kasta gallerist Gøril augene på barndomsheimen og garden ho kjøpte i 2009.

— Eg tenkte at dersom eg skulle satsa utanfor sentrum, så skulle det gjerast skikkeleg, og på ein måte som slo an. Utstillingane måtte vera i fokus i eit godt utstyrt utstillingslokale, og så måtte kaféen og det andre byggjast opp rundt galleriet, seier Gøril Guddal.

Galleriet i dalen held ope dagleg om sommaren, utover haustsesongen trappar Gøril Guddal ned, avsluttar året med ei større juleutstilling, og tek deretter pause fram til påske då eit nytt, aktivt sommarhalvår står for tur.