Dagen vart ikkje heilt som vanleg for bussjåfør Lars Wang i Rosendal. Då han henta bussen i garasjen ved Baroniet fredag morgon, blei han var ein lyd på utsida.

— Det romsterte noko frykteleg på utsida av bussen. Då døra vart opna, stod det plutseleg to geitebukkar som ville inn i bussen, fortel han til bt.no.

Dyra skjønte ikkje at dei ikkje kunne få vere med på tur, og sjåføren hadde eit svare strev med å få dei ut av bussen.

— Dei skulle inn i bussen, koste kva det koste ville. Eg måtte sparke dei av til slutt, seier han vidare.

Gav seg ikkje

Då bukkane var vel ute av bussen, kunne han starta på turen frå Rosendal til Årsnes og tilbake.

Men dei to bukkane bruse, som neppe skulle til setra å gjere seg feit, dit gjekk nemleg ikkje bussen, gav seg ikkje så lett.

Då bussen var tilbake i Rosendal sentrum etter om lag ein time, stod dei på busstoppet.

— Med det same eg opna døra, hoppa bukkane inn. Fleire av passasjerane måtte trå til for å få dei av. Bukkane «lukta hilman» (fæl lukt red. anm), og vi kunne ikkje ha dei inn på bussen, fortel han.

Forsøkte på rådhuset

Wang reknar med det er brunsttida som er årsak til den fæle stanken frå dyra.

Etter å ha vorte nekta på bussen, heldt bukkane fram mot rådhuset i bygda.

Der prøvde dei og å kome seg inn, og tilsette i kommunen måtte hjelpe for å få dei ut.

Litt seinare på dagen vart dei sameint med eigarane.

GODT HUMØR: Sjølv ikkje nokre illeluktande bukkar kan få bussjåfør Lars Wang i dårleg humør. FOTO: Privat.