KJERSTI MJØRVEGAR VALDE (foto)

Å mønstre på vikingskipet Haakon Haakonsson er som å kome ut av tidsmaskina, og oppdage at du har havna i vikingalderen. Høvedsmannen er alt på plass, i grove bomullsklede, med skinnpung i beltet og blankt sverd i slira. Skjenkjemeistaren står i stamnen, og på toftene ventar fire staslege friller på å gjere jobben. Her om bord er det nemleg kvinnfolka som ror.

Alt er som i den eldgamle tida. Heilt til lyden av ein Nokia rykkjer oss ut av vikingalderen.

— Av med mobiltelefonen, roper ei av frillene.

Men for seint. Vi er tilbake i 2002, og kan ikkje unngå å leggje merke til at vikingkvinnene brukar lebestift, eller at høvedsmannen røykjer Marlboro Light. Heller ikkje at den eine vikingen spelar «Napoleon med sin hær» på toradar.

Slike små detaljar avslører at dette likevel ikkje er plyndrarar og valdtektsmenn frå norsk fortid, men medlemmar av foreininga «Langskipet Haakon Haakonsson» i Bergen.

I 1998 kjøpte dei kjøpte ein tru miniatyrkopi av Gokstad-skipet, bygd av sunnmøringen Jacob Helset. Sidan har denne gjengen stadig reist på tokt for å møte vikingfrendar både på Shetland, i Irland, Frankrike, Yorke og Oslo, og tek elles oppdrag både for barnehagar, sogespel og andre.

Denne ettermiddagen skal skipet, som er oppkalla etter den store vikingkongen i Bergen, ro nygifte Lill Haugland og Stig Eggum ut Vågen og bort til bryllupsfesten på Admiral Hotel.

— Kvifor ikkje? Kunne dei gifte seg i slike båtar før i tida, så kan dei vel gjere det i dag, seier far til brura, Terje Haugland.

Ideen om brureferda på Vågen var hans. Og snart glir ein olivengrøn Rolls-Royce med kvit sløyfe inn på Fisketorget. Toradarvikingen spelar brudeparet om bord i skipet med visa om Anne Madam, mens høvedsmann Antony Sjursen smell champagnekorken så høgt over Fisketorget at turistane applauderer for «the real vikings».

— Friller, klare? spør Sjursen myndig.

— Jaaa, kjem det unisont.

— Årane i vatnet!

BRUDEFERDEN PÅ VÅGEN: Ole Hella, skjenkjemeister om bord på vikingskipet Haakon Haakonsson serverte champagne, ikkje mjød, då Lill Haugland og Stig Eggum fekk vikingskyss til sin eigen bryllupsfest i går. Bjørn Vik trakterte toradar, mens frillene måtte ro. Bakerst i bildet ser vi Sissel Aga (t.h.) og Anne Gerd Lindqvist ved årene.