• Hei, kva gjer du her? - Eg var på fest i Skjerjehamn, og dagen etterpå vakna eg plutseleg opp i Vik, seier Kristian Heen.

— Kva tenkte du då?

— Eg lurte på korleis eg skulle kome meg tilbake, for eg har bilen min ståande der. Det er veldig dårleg kommunikasjon mellom Vik og Skjerjehamn har eg funne ut. Eg må reise tilbake til Bergen og ta med meg sykkel på ekspressbåten til Mjømna. Derifrå kan eg sykle til bilen, og køyre heim.

— Korleis har turen vore?

— Eg har hatt det veldig fint på vestlandskysten, så det var verdt turen. Aller finast var det i Skjerjehamn.

— Korleis er det å vere blindpassasjer?

— Eg har blitt tatt godt hand om av mannskapet, og fått både mat og husvære. Eg har prøvd å bidra med litt fisk til hushaldninga. I går fekk eg to lyr, det blei god middag.

— Kva gjer ein når ein er stranda i Vik?

— Det går mest i boklesing og fisking. I dag har eg ikkje fått noko fisk, så no gir eg opp trur eg.

BLINDPASSASJER: Kristian Heen gjekk om bord i «Granvin» i Skjerjehamn, og vakna opp i Vik neste dag. FOTO: MÅLFRID BORDVIK