To soverom, varmt vatn, elektrisitet, trådlaust internett, digital-TV, oppvaskmaskin, mikrobølgeomn, kjøleskap, vaskemaskin, full møblering og til og med eigen parkeringsplass, for 7600 kroner i månaden. Det kan du få om du flyttar inn i Torborg Nedreaas gate 18.

Høyres det for godt til å vere sant? Det er det også.

Leilegheita ser nemleg slett ikkje ut som på bileta. Det fekk den 21 år gamle sonen til Liss Nibe frå Hammerfest erfare då han kom over annonsa på Finn.no.

— Eg synest prisen var usannsynleg bra, og bileta var mildt sagt lekre. Etter å ha vist interesse, fekk eg ein hyggeleg e-post frå ein person i London som skreiv at leilegheita tidligare hadde vore leigd ut til dottera, som skulle flytte tilbake til London og etablere seg, seier Liss Nibe.

LES OG:

— Verka kjempetriveleg

I e-posten fortel utleigaren om både kona Sarah, dottera Maria, og familien sin åtte år gamle Labrador.

— Han verka som ein kjempetriveleg type, og var veldig personleg, seier Nibe.

Den personlege tonen snur derimot brått neste gong utleigaren tar kontakt. Plutseleg har utleigaren hastverk, og vil ha depositum oversendt så snart som mogleg.

«...you will receive the Keys in less than 3 days, if you move fast as well», skriv han.

- For godt til å vere sant

Utleigaren, som hevder å vere grafisk designer busatt i London, foreslår i epost-korrespondansen å sende kontrakt og nøklar til leilegheita i posten, mot betalt depositum til ein utanlandsk konto.

— Pengane skulle sendast til eit firma kalla TNT. Om sonen min ikkje likte leilegheita, sa utleigaren at vi ville få pengane tilbake, seier Nibe.

Då Liss Nibe og sonen sendte to e-postar med forskjellig innhald til utleigaren, fekk dei heilt identiske svar i retur. Då byrja det verkeleg å skurre.

— Eg søkte opp adressa på Google maps, og bileta frå utsida stemte ikkje med dei bileta vi fekk tilsendt, seier ho.

Etter å ha ringt til ein tidligare leigetakar, fekk Nibe bekrefta at leilegheita såg ganske annleis ut enn det bileta viser.

— Eg synast det er trist at folk prøver å gjere slik svindel. Om eg ikkje hadde hatt ein son som hadde peiling på dette, kunne eg kanskje ha tatt tilbodet for god fisk. Det var rett og slett for godt til å vere sant, fortel Nibe, som valte å ikkje overføre pengane.

Oppdagar svindel raskt

Også andre leigetakarar BT har vore i kontakt med fortel at dei har motteke e-posten. Finn.no opplev fleire liknande svindelforsøk i månaden.

— Om vi har mistanke om svindel, vil annonsa bli stoppa med ein gong, og vi sender ut varsel til alle som har teke kontakt på annonsa, seier Lars Vinden, ansvarleg for forbrukertryggleik i Finn.no.

Sikkerheitsavdelinga granskar mellom anna bileta, historikken til annonsøren, og kor mange som har vore i kontakt med utleigaren.

— Normalt vil svindelannonser verte fjerna i løpet av nokre timar, seier Vinden, som legg til at alle annonser må gjennom kontroll og sms-verfisering med norsk mobiltelefonnummer før dei publiserast.

Sommaren er høgsesong

— Spesielt på sommaren før studiestart opplev vi det igjen og igjen at folk blir forsøkt svindla, seier regiondirektør Pia Kleppe Morken i Forbrukarrådet i Hordaland og Sogn og Fjordane.

Kleppe Morken seier at Forbrukarrådet i Hordaland og Sogn og Fjordane kvar haust mottek mellom 10-12 førespurnader frå leigetakarar som er usikre på om det er snakk om svindel.

— I dette tilfellet er svindelen ganske openbar, men svindlarane blir meir og meir utspekulerte, seier ho.

Ifølgje Kleppe Morken er det viktig at ein aldri betalar depositum inn til ein privat konto.

— I tillegg må du alltid gå og sjå på leilegheita. Om du ikkje kan møte opp, få nokon andre til å gå på visning for deg.

Om du først skulle gå i fella, har du veldig få rettigheiter, hevder Kleppe Morken.

— Det er veldig ofte slik at svindlarane vil ha pengane overført til utanlandske kontoar, og då er dei vanskeleg å få att. Skal du ha sjanse til å få pengane tilbake, må du anmelde, og sjølv då er sjansen liten, seier ho.

Tips? Send MMS/SMS til 2211, eller skriv e-post

DELIKAT: Luringen i London lokka med to soverom.
FRA ANNONSEN
LITT AV KVART: Ifølgje annonsen var det både oppvaskmaskin, mikrobølgeomn, kjøleskap, vaskemaskin i leilegheita.
FRA ANNONSEN