Bjørnen har bokstavleg tala slått til like ved hyttefeltet på Oppdalsstølen. Området der sauene blei funne ligg berre eit par hundre meter frå riksvegen.

To av sauene har slagskader. Dei fem andre er jaga utfor eit stup. Viltkonsulent Per Ivar Steinsæther i Valdres seier til Sogn Avis at måten dyra har blitt tatt av dage på gjer at det ikkje er tvil om bjørn har vore på ferde. Viltkonsulenten seier det ikkje er aktuelt å starte jakt på rovdyret.

— Vi har med eit streifdyr å gjere, truleg ein yngre hannbjørn som rører seg over eit stort fjellområde, seier Steinsæther.

Han meiner folk ikkje treng vere redde, men det er nok lettare å seie enn å få til i praksis. Hytte-eigarar Sogn Avis har vore i kontakt med, seier dei er urolege.

— Det er rart å tenkje på at dette har skjedd like ved hytta vår. Vi er ekstra på vakt, seier ein av dei.