Langrennsløpar Sjur Røthe vart sjuk fredag, og renndagen laurdag måtte også romkamerat Chris Jespersen melde avbod på grunn av sjukdom til 30 km friteknikk i Davos.

— Vi har vore romkameratar denne veka. Sjur blei sjuk i går og eg i dag, skriv Jespersen i ein sms til bt.no.

Verste tidspunkt

Sjukdomen kom på verst tenkjeleg tidspunkt med tanke på at 30 km friteknikk er ein distanse som passar begge godt. 19. desember blir laget til Tour de Ski teken ut.

Begge håpar på plass. Norge sender sju herreløparar.

— Det er uvisst kor ille sjukdomen er. Førebels er eg berre sår i halsen. Vi satsar på at det går fort over, seier Jespersen. Neste helg står 15 km klassisk på programmet i Rogla.

Kulekøyring

Med 14. plass i finalen leverte Tevje Lie Andersen (20 år søndag) frå Voss Freestyleklubb det beste norske resultatet under verdscupen i kulekøyring i Ruka i Finland laurdag.

Vinjar Slåtten frå same klubb vart nummer 33 etter å ha missa på andre hoppet. Ingvild Kvåle Bergesen (20) frå Fusa og Bergen Freestyleklubb vart nummer 29.

Beste norske kvinne vart Hedvig Wessel med 15.-plass. Knut Lemme fra Voss fall i kvalifiseringa.