Reint hell gjorde at den skadde og sterkt forkomne kvinna vart funnen på Osterøy litt etter klokka 11 søndag formiddag.

— Eg var ute og leitte etter eit lam. Nede i ein liten dal ved Vevle fekk eg sjå at det låg eit menneske. Ho sa ingenting, og det var heilt tilfeldig at eg fekk auge på henne. Det er ikkje kvar dag det går folk nedi der, seier Knut Rongved frå Rongve på Osterøy.

Kvinna låg på sida, samankrøkt, og hadde berre ei ulltrøye og dongeribukse på seg.

— Det var ikkje noko kjekt. Først trudde eg det var eit dødt menneske som låg der, eller at ho sov. Men ho var vaken, utan at det var mykje prat i henne. Ho sa ho hadde prøvd å rope. Men det var jo heilt uråd for nokon å høyre henne der ho låg, seier Rongved.

Temperatur på 31 grader

Kvinna fortalde at ho fredagskvelden i sjutida hadde gått ut for å sjå etter sauen til bror sin. Broren driv familiegarden på Vevle, men har vore bortreist dei siste dagane.

Ved bekken nede i ein liten dal nedanfor husa gjekk den mannvonde sauen til angrep på kvinna. Ho vart skamfaren, særleg i beina, og greidde ikkje å ta seg opp att til huset. Først halvtanna døgn seinare kom hjelpa.

— Ho hadde fått skikkeleg juling. Ho var ikkje i stand til å gå ein meter, og sa ho hadde ilt over heile kroppen, seier Rongved.

Han sprang straks til næraste hus, som ligg nokre hundre meter opp ein bratt bakke, for å tilkalle hjelp. Deretter sprang han ned att med teppe for å prøve å få litt varme i kvinna. Luftambulansen kom til staden etter kort tid. Då var kroppstemperaturen nede i 31 grader celsius.

Alvorleg, men stabil

— Det må ha vore kaldt. Då eg stod opp i 6.30-tida søndag morgon var det 4 1/2 grad i lufta, seier Johannes Rongved, som er av dei næraste grannane til garden der kvinna vart skamfert. Sonen hans bur endå nærare. Han var ute på altanen både fredagskvelden og laurdagskvelden, utan å høyre ropa frå den skadde.

Den 60 år gamle kvinna låg i går ettermiddag innlagt ved intensivavdelinga ved Haukeland Sykehus. Tilstanden hennar var då alvorleg, men stabil.

Då Bergens Tidende var på garden i går ettermiddag, gjekk den mannvonde vêren framleis på det inngjerda beitet der han hadde gått til angrep.

MANNVOND: Den velvaksne vêren (t.h.) på Osterøy stanga den 60 år gamle kvinna så hardt at ho ikkje greidde å gå eller krabbe dei hundre metrane opp bakken og i hus.
Foto: Helge Skodvin