– Eg prøver å ikkje flagga akkurat den biten så høgt. Men det er mange som slit med gjenferd, ofte heile familiar, opplyser Sætre.

54-åringen frå Helland i Fitjar har over 300 oppdrag årleg. Rundt 100 av dei skal gå direkte på utdriving av spøkjelse, eller energiar som han helst likar å omtala det som.

– Dette er folk som opplever klyp og dytt, og gjenstandar som flyttar seg. Dei vert rett og slett terroriserte av gjenferd, forklarar han.

Får ikkje sova

Spøkjelsa til trass — det er healing og avmagnetisering som er hovudgeskjeften hans. Sætre har kundar frå heile landet, og ofte er plagene deira knytt til vassåreproblematikk.

– Enkelte er frykteleg sjuke, og får knapt sova. Då handlar det om å få ned vibrasjonane i vassårene for at dei skal få livet tilbake.

Fanden sjølv

Sætre vart klar over at han hadde overnaturlege evner for 5-6 år sidan, då han sjølv vart skikkeleg sjuk. Det var uråd for han å halda fram i tømraryrket. Han oppdaga at han ikkje tålte elektronikk, jordstråling og vassårer.

Magnetterapi vart redninga, og han merka då at han ikkje var som alle andre. Han har ein stor kundekrins på Stord, men i heimkommunen Fitjar er han ikkje så populær.

– Nei, her er det mange skeptikarar.

Han har opplevd å få mykje rart i postkassen sin. Deriblant Det nye testamentet. Det verste skal likevel ha vore teikneserien som skal ha antyda at han var «fanden sjølv».

– Slike ting er synd. Du vert aldri profet i di eiga bygd, er alt han vil seia om den saka.

– Og no flyttar du altså?

– Ja. Eigedomsskatten var dråpen som fekk begeret til å renna over. Eg hadde aldri trudd eg skulle reisa frå Fitjar, men no dreg eg. Eg ser fram til å koma meg ut og treffa kundane mine, seier den separerte trebarnsfaren.

Les meir her:

Frå Arendal med håp

– Dette er humbug

Trur du på spøkjelse? Sei di meining!