På fem år har Amfi-kjeda meir enn dobla talet på kjøpesenter i Noreg frå 12 til 25. Med ein årsomsetnad på ti milliardar kroner har kjeda teke steget opp på tredje plass i Noreg etter Steen & Strøm og Olav Thon.

Thon er elles storaksjonær i Amfi (30 prosent) saman med Coop (13), Berg Jacobsen Investor (12,3), Reitan Eiendom (12) og Amfi-gründer Lars Løseth (10 prosent).

Kjeda blir drifta frå Surnadal. Ein milliard av årsomsetnaden skriv seg frå drift og deleigarskap i ni andre senter, blant dei Sogningen Storsenter i Sogndal. Amfi har heileigde kjøpesenter i Florø, Stryn, på Voss, Os og Stord.

I høveleg tid til julehandelen opna «nye» Amfi Stord sist veke. Kjeda har satsa 75 millionar kroner på utvidinga for å styrka gamle Stord Senter i den skjerpa konkurransen med kjøpesenter på Stord og i Haugesund.

— Senteret hadde kome til å gå ut på dato om vi ikkje gjorde noko, seier eigedomssjef Geir Garte i Amfi Eiendom.

Amfi Stord tek sikte på ein omsetnad neste år på 300 millionar kroner, opplyser Garte.

Med senterutvidinga har Norgesgruppen etablert ein Meny-butikk også på Stord, til erstatning for ein Spar-butikk som dei siste åra opplevde fallande omsetnad. Ti millionar kroner har Norgesgruppen investert i ombygginga på senteret.

Amfi Stord har planar saman med Stord kommune for ei vidare utbygging av senteret og nabobygget Stord kulturhus. Det kan bli badeland og gangbrusamband. Kommunen skal også stå for drifta av parkeringsanlegget i senteret. Dei 260 p-plassane blir avgiftspliktige på dagtid etter nyttår.