Klokka 19.40 i kveld møtte ein trailer ein annan trailer på europaveg 134, på ei strekning politiet sjølv kallar «ein krøttersti».

— Det er ein kjerreveg. Den eine traileren kom utfor kanten og køyrde ut, seier Agnar Austerheim, operasjonsleiar i Haugaland og Sunnhordland politidistrikt.

Utforkøyringa skjedde ved Stordalen i Etne. Lasten er 30 tonn med aluminium.

Mobilkran må til for å få opp att bilen, ein operasjon som vil ta rundt to timar. Dette vil skje frå midnatt, og dermed blir vegen stengd i den tidsperioden.

— Traileren hamna slik at lasten forskyvde seg. For å vere sikker på at lasten ikkje skulle forskyve seg vidare, trengde dei mobilkran, seier Austerheim.