Tre dagar før jul leikar ei ti månader gammal jente på golvet heime i Måløy. Plutseleg tek ho til å hyle. Ungen blir utrøysteleg og vil ikkje ta til seg mat resten av dagen. Alle forsøk kjem opp igjen.

Mor er redd for at vesle Fride kan ha putta noko i munnen og svelgt det. Neste dag tek ho jentungen med til lege. Han seier at det mest sannsynleg er omgangssjuke. Dette er den første diagnosen jenta får.

Dei neste tre vekene skal alt i alt sju legar undersøkje barnet. Øyrebetennelse, virusinfeksjon og hardhendt mating er andre forklaringar legane har på at barnet stadig har feber og kastar opp all mat. Til slutt må dottera medisinerast for å få i seg nok næring.

— Eg hadde heile tida ein magefølelse som sa meg at noko var gale, seier mor Ruth Anne Venøy.

Les også:

Blå om munnen

Jula 2011 forsvinn i feberrier og oppkast. Fride får knapt i seg verken mat eller drikke. På nyttårsaftan prøver dei å gi henne mat frå eit middagsglas.

Jenta hyler og blir blå om munnen. Maten kjem opp igjen.

— Eg vart livredd, fortel mor.

Straks legekontoret opna over nyttår, går dei til lege igjen. Men legen meiner at Fride truleg er uvel, fordi ho har fått maten i halsen. "Ok, eg er sikkert overhysterisk", tenkjer mor.

"Virusinfeksjon"

Ein dag i barnehagen rann det væske ut av øyra til Fride. Mor henta henne og drog rett til lege. Han såg at Fride var raud bak i halsen og fekk mistanke om at ein gjenstand kanskje stod fast i halsen.

Legen tilviste henne straks til barneavdelinga ved Førde sentralsjukehus. Både legen og mor opplyste spesialistane om kva dei trudde kunne ha skjedd.

Likevel tok ingen røntgen av Fride. I staden lytta barnelegane på lungene til jenta og gav henne diagnosen "virusinfeksjon i halsen".

Under legevisitten neste morgon gjentok mor mistanken om at Fride kunne ha svelgt noko. Det avviste legen.

— Det ville vi høyrt då vi lytta på henne med stetoskop, sa legen. Han konkluderte med at det var ingen risiko å sende Fride heim, fortel mor.

Retur til Førde

I bilen heim til Nordfjord vart Fride alvorleg sjuk. Heime i Måløy målte mor temperaturen til nær 40 grader. Jenta vart meir og meir slapp og apatisk.

— Til slutt fekk vi knapt kontakt med henne. Eg var fortvilt og redd. Eg visste at noko var gale, men følte at ingen ville høyre på meg, seier mor.

Neste kveld fekk jenta kome til hos legevakta på Eid, som sende henne tilbake til sjukehuset i Førde. Neste morgon vart barnet røntgenfotografert.

Mor fortel at ho høyrde ein av pleiarane gispe ved synet av det første røntgenbiletet før ho sa: "Det er det foreldra har sagt heile tida".

Batteri i spiserøyret

Legen sa det same. Foreldra hadde hatt rett. I spiserøyret låg ein gjenstand, mest sannsynleg eit batteri. Mor vart ikkje redd. Ho vart letta.

— Eg tok til å grine, seier ho.

Barnet vart straks sendt med ambulanse til Haukeland Universitetssjukehus, der eit knappebatteri med ein diameter på 22 millimeter vart fjerna.

Ifølgje sjukehuset var det "betydelig erosjon på batteriet, men ingen målbar spenning".

Jungeltelegrafen

Eit halvt år seinare spring ei glad, lita jente med raude krøller gjennom sjukehuskorridoren i Bergen. Mor og far har si fulle hyre med å passe på. Fride, som no er blitt 14 månader, er til etterkontroll på Haukeland.

— Alt ser ut til å ha gått bra. Ho har ingen varige mein. Vi er veldig glade for at ho er heilt frisk att, fortel far Jan-Erik Kvalheim.

Foreldra fortel at dei ikkje har mista trua på legar, og at dei eit svært godt forhold til legane i Vågsøy.

— Alle er veldig leie seg for det som har skjedd.

I heimbygda går jungeltelegrafen. Historia om jenta som fekk eit batteri i halsen er blitt ein "snakkis", og rett som det er blir foreldra stoppa av ukjende på gata i Måløy.

Så mange ber om å få syn for segn, at ei lita plasthylse har fått fast plass i den svarte stellebagen på vogna.

Inni ligg eit minne for livet. Pittelitt mindre enn eit kronestykke. Eit trevolts litium-batteri.

MINNE FOR LIVET: Knappebatteriet har ein diameter på 22 millimeter, og er litt mindre enn eit kronestykke.
TOR HØVIK
MYSTERIUM: Kor batteriet som sette seg fast i halsen til Fride kom frå, er framleis eit mysterium for foreldra Ruth Anne Venøy og Jan-Erik Kvalheim.
TOR HØVIK