— Erfaringsmessig er det stor utfart til Folven camping og sommarskisenteret på Strynefjellet denne helga. Difor gjennomførte politiet ein stor kontroll. Resultatet er skremmande og kan tyde på at vi bør ha kontrollar her oftare, seier operasjonsleiar Marita Biesman ved Sogn og Fjordane politidistrikt. Det var UP og lokalt politi frå Stryn og Skjåk som gjennomførte aksjonen.

Laurdag vart fire bilførar tekne med promille på Hjelle og ein vart teken på Fosnes i Oppstryn.

– Det vert rapportert om at det er skiungdom som er tekne i promillekontrollen, seier Biesman.

Ni førarkort vart beslaglagt på grunn av stor fart.

– Det verste tilfellet var ein person fødd i 1983 som køyrde i 155 km/t i 80-sona på Gjørven fem kilometer sør for Stryn. Bilen var full av rusa ungdomar på veg til fest på Folven, seier Biesman.

I tillegg til dei ni førarkortbeslaga, fekk 85 bilførarar bot for fartsoverskriding.