Saman med mannen og tenåringssonen var ho på veg frå Sogndal til Bergen. Mellom Evanger og Bolstad skjedde det: Dei frontkolliderte med ein møtande bil.

20 år gamle Rune Straume Samuelsen omkom i ulykka.

— Hugsar ikkje smellet

Det er rart når ein hamnar midt opp i det. Det heile skjedde så fort at eg rakk berre å tenkje ein halv tanke om korleis eg skulle unngå bilen som kom rett mot oss. Eg hugsar ikkje smellet, men kom meg raskt ut av bilen og fekk ut 15-åringen. Mannen min hadde store ryggsmerter, fortel Midtbø.

Ho sat sjøl bak rattet da kollisjonen skjedde. Ifølgje politiet er årsaka til ulykka at bilen til den omkomne kom over i feil kjørebane.

— Grunnen til det kjenner vi ikkje. Det jobbar vi no vidare med å finne ut av, seier politioverbetjent Einar Bystøl ved Voss lensmannskontor.

— Eg er letta over at eg ikkje kan klandrast, seier Midtbø.

Brot i ryggen

Etter ulykka vart familien frakta vekk med ambulanse og køyrd til Voss sjukehus.

Her vart det konstatert lettare skadar for mor og son, mens mannen fekk påvist eit brot i ryggen, og skal opererast på Haukeland universitetssjukehus fredag.

— Eg er kjempeglad for at me bur i eit land som Norge, med eit helsevesen som stiller opp gratis for alle, seier Midtbø.

Ho sett seg i dag på toget saman med sonen, for å treffe mannen og dei to eldre borna som studerer i Bergen.

— Totalt sett har det gått bra med oss, men dette er ei sterk påminning om å ta vare på dagen og kvarandre, skriv Midtbø til sine vener på Facebook.

22 omkomne på fem år

Strekninga mellom Voss og Bergen er svært ulykkesbelasta. Sidan 2008 har 22 personar omkome på denne delen av E16.

— Eg er ikkje så kjent på vegstrekninga, men tykkjer den er blant dei betre, brei og oversiktleg - i høve til andre vegar på Vestlandet. I utgangspunktet er dette ei «heilt ordinær» og altfor vanleg trafikkulukke. Eg ikkje vil spekulere i kva som er årsaka, men reknar med at politiet finn ut av det utifrå fakta og målingar, seier Midtbø.